Rơwang hrơi tơjuh rơgao, Sang bruă apui lơtrik tơring čar Dak Lak gum hrom hăng Anom bruă tơhan polih pơgang pơgăn apui ƀong pơtuh hăng pơtlaih mơnuih – Kông ang tơring čar Dak Lak pơphun 2 anih hrăm lăi pơhing, lăi pơthâo bôh thâo hăng pơhrăm bruă pơgang pơgăn apui ƀong brơi rơbêh kơ 530 čô mơnuih apăn bruă, mơnuih mă bruă gah apui lơtrik. Sang bruă ră anai wai lăng 17 ring bruă gah anih anom amra hmâo apui ƀong, pơtuh; rơngiao kơ anun, dô̆ hmâo 14 bôh sang git gai pơkĕ apui mơng hơdôm bôh plơi pla.

Hơdôm hrơi rơgao, bruă pơgang pơgăn apui ƀong, pơtuh dưi hmâo sang bruă đing nao, tuh pơplai, pioh ngă tui klă. Amăng tal pơhrăm rơgao, mơnuih mă bruă amăng sang bruă dưi hmâo mơnuih apăn bruă Tơhan polih pơgang apui ƀong tơring čar Dak Lak lăi pơhing kơ tơlơi apui ƀong, pơtuh, lăi pơthâo lu hră pơ-ar tơlơi phiăn hmâo bơdjơ̆ nao bruă anai. Hrŏm hăng bruă prăp lui bôh thâo, hơdôm bruă pơgang pơhlôm, mơnuih pơhrăm dưi pơhrăm pel ĕp hơdôm tơlơi amra hmâo apui ƀong, pơtuh, mă yua lông lăng hơdôm mơta măi mok pơgang apui, bôh thâo tơtlaih đuăi ƀơi anih apui ƀong... Hrŏm hăng anun, pơhrăm pơgang pơgăn apui bong, pơtlaih mơnuih lơm hmâo apui ƀong ƀơi Sang bruă hăng anih dưm gơnam Ea Tam. Tal pơhrăm anai sang bruă lok glăi, pơđĭ tui tơhnal juăt bruă amăng pơgang pơgăn apui ƀong hăng pơtlaih mơnuih kiăng plai ƀiă răm rai gah ană mơnuih hăng kông ngăn tơdah hmâo apui ƀong hăng pơtut truh./.