VOV4.Jarai - Pơtrut kơtang hơdră tla prăk apui ƀu yua prăk mơta, hơdôm hrơi rơgao, Sang bruă apui lơtrik Daklak hmâo pơlir laih hăng 15 bôh sang prăk hăng 9 grŭp ngă tui bruă pơhrui prăk apui. Hơdră tla prăk anai gêh gal hăng mơnuih blơi yua apui, hrơi mông nao rai, hrom hăng anun djru gơnong bruă apui lơtrik hơdư̆ ƀiă ngă soh, wai lăng klă prăk hnư̆h. Truh ră anai, giăm hmâo 90% mrô mơnuih blơi yua apui mơng Sang bruă hmâo ngă hră tui hơdră anai. Ƀu djơ̆ kơnong kơ mơnuih ƀơi plơi prong ôh mơ̆, bruă tla prăk ƀu yua prăk mơta ăt dưi hmâo lu mơnuih blơi yua apui ƀơi kual asuek, ataih ngă tui mơn.

Mơnuih mă bruă gah gơnong bruă apui lơtrik pơtô brơi kơ mơnuih blơi yua apui mă yua anăn tla prăk ƀơi telephôn

Hrom hăng bruă lăi pơhing kiăng mơnuih ƀôn sang hăng mơnuih blơi yua apui thâo hluh hơdôm tơlơi gêh gal mơng bruă tla prăk ƀu yua prăk mơta, PC Daklak ăt pok pơhai mơn mă yua QR code tui tơhnal pơkă mơng Sang prăk Kơnuk kơna kơ abih bang mơnuih blơi yua apui. Rim mơnuih blơi yua apui amra hmâo sa QR code, mă yua amăng abih bang hră pơ-ar, hră tla prăk apui hăng lăi pơthâo prăk apui. Mơnuih blơi yua apui amra djă pioh tơlơi pơhing tañ ƀơi telephôn djă hyu kiăng ngă tui bruă tla prăk kơnong kơ sa hơdră ngă amuñ amĕ./.

Siu H’ Prăk: Pơblang