Pơkĕ hyu apui yua pơhlôm, na nao, djru hơdôm bruă pơđĭ kyar bơwih ƀong mơnuih mơnam, mă yua amăng sang anô̆ mơng mơnuih ƀôn sang. Mơng akô̆ thun truh ră anai, mrô apui sĭ yua ƀơi Daknông hmâo rơbêh kơ 520 klăk kWh, đĭ 6,5% bơhmu hăng thun hlâo.

 Truh ră anai, abih bang mơnuih blơi yua mơng sang bruă dưi pơkĕ brơi 12 mơta bruă pơkĕ apui hluai tui Anom bơwih brơi kơ mơnuih mă yua hăng Plăng bơwih brơi bruă hrom lŏn ia; rơbêh kơ 95% mrô mơnuih mă yua apui hluai tui internet hăng tui jơlan gah măi mok. Kơnong hăng măi djă hyu hơdeč hmar tô hăng Internet lĕ mơnuih ƀôn sang amra lăng mrô mă yua apui rim hrơi, rim blan, lăi pơthâo tơlơi truh, rơkâo pơplih pơkra...; hrom hăng anun djru pơsir prăk apui yua tañ./.