VOV4.Jarai - Hăng tơhnal pơkă pơđĭ dlông bruă bơwih brơi, hơdôm hrơi rơgao, Sang bruă apui lơtrik Daknông hmâo pơplih laih akô̆ tlôn, hră pơ-ar mă yua, pơđĭ tui anô̆ pơdah rơđah amăng bruă pơsir hơdôm mơta hră pơ-ar gah apui lơtrik. Hrom hăng anun pơplih hơdră tŭ mă tơlơi rơkâo bruă bơwih brơi apui lơtrik, kah hăng ƀơi anăp pơ̆ hơdôm anih ngă hră pơ-ar, lăng nao rai mơng ataih tui phun akha bơwih brơi kơ mơnuih yua apui 19001909, tui website... Lom hmâo tơlơi akă ƀu rơđah kơ apui lơtrik, mơnuih ƀôn sang kơnong kơ iâu kơ phun akha bơwih brơi apui yua lĕ dưi pơsir tañ mơtăm, ba glăi bôh tơhnal.

Mơnuih mă bruă PC Daknông dô̆ gak pơtô brơi mơnuih mă yua hơdôm bruă bơwih brơi kơ apui yua

Kơnong tui Glông bơwih brơi mơng dêh čar, mơng akô̆ thun truh ră anai, PC Daknông hmâo pơsir giăm truh 20.000 hră tŭ mă bơwih brơi apui yua lăng nao rai mơng ataih dăp tal 4. Kiăo tui anun, hơdôm hrơi tŭ mă, pơsir pơkĕ apui lơtrik phrâo ngă ƀiă hĭ 2 hrơi bơhmu hăng tơlơi pơkă. Ră anai Sang bruă pok pơhai pơkĕ hyu 12 bôh anih bơwih brơi apui yua mơng ataih Glông bơwih brơi mơng dêh čar kah hăng pơkĕ apui lơtrik phrâo, pơsir prăk apah yua apui, pơplih bôh yôm hră pơkôl blơi sĭ apui... Mơnuih yua apui kơnong kơ kiăng mut ƀơi anăn www.dichvucong.gov.vn lĕ amra mă yua 12 mơta bruă bơwih brơi mơng ataih anai ƀu glêh tơnap ôh hăng tañ dong./.

Siu H’ Prăk: Pơblang