VOV4.Jarai - Hơdôm hrơi rơgao, ƀing hlơi hor nao pơ Đà Lạt, khăp kơ anŏ mơtah mơdah prong đut mơta lăng mơng hơdôm blah glai hơngo lêng dŏ kơtuă soh lơ̆m hmư̆ hing hơmâo hơdôm rơtuh phun kyâo hơngo ƀơi kual glai pơgang hơmâo arăng drôm bơrơbuh rơdiăo. Wơ̆t hăng gong gai plơi pla, hơdôm anom apăn bruă mơng tơring Lâm Đồng ăt dŏ kơtuă, rơngôt biă mă lơ̆m hơmâo bruă tui anai. anai hơmâo lăng jing bruă drôm glai prong hloh mơng hlâo truh kơ ră anai ƀơi plơi prong Đà Lạt. Ƀing koh drôm kyâo ƀu hŭi kơ tơlơi phiăn ba mơtăm yơh.

Mơng jơlan prong 27C, mut nao pơ glai anăp nao pơngŏ năng ai 3km kah mơng truh pơ anih arăng koh drôm kyâp kơtang, anun lĕ lô A. lô B, kual 15, kual 144B, phường 8, plơi prong Đà Lạt (Lâm Đồng). Anai lĕ glai pơhlôm pơgang dŏ giăm guai tơring glông Lạc Dương hăng plơi prong Đà Lạt, kual glai yua Anom bruă wai lăng glai rưng Lâm Viên wai lăng. Hơdôm rơtuh phun kyâo hơngo 3 pok hla hơmâo arang drôm bơrơbuh tơket tơkeng hăng kơnua čư̆, jum dar hơmâo kyâo hơngo mơtah, hơum, hiăm biă mă. Ƀơi anai, rơngiao kơ trơ̆i, drôm ƀhiao kyâo hơngo anet prong, arăng ăt koh drôm hơdôm mơng ha ƀut kyâo hơngo anet ƀơi djŏp anih mơtăm.

Anih arăng drôm bơrơbuh kyâo hơngo ƀơi kual glai 144B, phường 8, plơi prong Đà Lạt (Lâm Đồng).

Trung tá Phạm Thị Thu Hiền, Grup tơhan polih hơduah ĕp kơđi bruă bơwih ƀong, bruă ngă khua, Kông an plơi prong Đà Lạt, mơnuih mơng grup hyu sem lăng anih hơmâo arăng drôm kyâo dŏ kơtuă mơn, ñu lăi bruă drôm bơrơbuh kyâo anai lĕ brơi ƀuh arăng hơmâo hơtai biă, ƀu hŭi ba mơtăm yơh, mă măi uă kyâo drôm rơbuh abih kyâo. Hăng rơbêh 400 phun kyâo hơngo arăng bơrơbuh tui anai ƀu dưi ngă amăng ha hrơi đôč ôh.

“Gah yŭ adih lĕ arăng phrâo drôm tom brơi, tom adih đôč, bơ ƀơi anai lĕ arăng drôm sui ƀiă yua dah hla kyâo hơngo kơñĭ yơh. Tui anai lĕ arăng drôm kyâo sui laih, juăt ngă na nao, kư 2 - 3 hrơi arăng drôm ha wơ̆t”.

Rơngiao kơ hơmâo hơtai, ƀu hŭi kơ tơlơi phiăn, ƀing hyu drôm kyâo anai juăt ngă bruă anai laih, bruă hyu drôm kyâo jing bruă juăt ngă re se. pơsit brơi tơlơi anai lĕ hơdôm nam arăng trơ̆i, drôm hơmâo ngă tơpă, djơ̆ tơhnal; phun hơngo rơbuh mơng lu bơnah, rơbuh brăng, huăi bơrơkua nao rai ôh, ngă bơbrăng kah hăng neh met wa pơhrui gơnam mơng hmua mơtăm.

Anih arăng drôm bơrơbuh kyâo hơngo ƀơi kual glai 144B, phường 8, plơi prong Đà Lạt (Lâm Đồng).

Rơngiao kơ anun, anih hơmâo arăng koh drôm dŏ ƀơi guai giăm đang glai yua Anom bruă wai lăng glai Lâm Viên wai lăng. Bruă anai kơnong hơmâo ƀing thâo hlâo, juăt nao rai pơ anai, ƀudah hơmâo mơnuih amăng anom bruă anai pơčrâo brơi kah mơng dưi thâo sit anih drôm.

Yua đang glai ataih đơi mơng anih ană plơi dŏ laih anun glai ñu prong, truh mơguah lơ 18/5, hơdôm anom bruă ăt glăk dŏ sem lăng pơ anih arăng drôm kyâo, jŭ yap glăi mrô kyâo arăng drôm ƀudah prăk kăk rơngiă hơdôm pă. Tui hăng ơi Lê Thái Sơn, Khua anom bruă wai lăng glai plơi prong Đà Lạt, glai rưng arăng phă dŏ sĕp amăng lăm glai, bruă nao rai či pơkra, ba hyu kyâo tơnap biă, ƀu dưi ôh, tui anun, arăng koh drôm kyâo či ngă hơget lĕ ƀu thâo ôh.

“Anih arăng drôm kyâo lĕ anih nao rai tơnap biă mă, dŏ amăng lăm glai, ƀu giăm đang hmua ôh. Tơdơi kơ ƀuh kyâo amăng glai hơmâo mơnuih drôm, ƀing apăn bruă mơng plơi prong Đà Lạt gir hyu ĕp ƀing phă glai”.

Anih arăng drôm bơrơbuh kyâo hơngo ƀơi kual glai 144B, phường 8, plơi prong Đà Lạt (Lâm Đồng).

Lơ̆m anun, ơi Nguyễn Văn Sơn, Kơ-iăng khua Jơnum min mơnuih ƀon sang plơi prong Đà Lạt brơi thâo, anai lĕ bruă koh drôm kyâo hơngo prong hloh mơng hlâo truh ră anai. Glai anai ñu hơmâo čư̆ glông, nao rai tơnap, hơmâo lăng kah hăng anih arăng ƀu thâo mut nao drôm ôh. Yua hnun lơ̆m hơmâo tơlơi anai, ngă kơ khua mua gong gai dŏ kơtuă mơn. Yua hnun mơn bruă anai arăng kaih ƀuh, kaih thâo. Ăt tui hăng ơi Sơn mơn, rơngiao kơ mrô kyâo arăng bơrơbuh, dŏ hơmâo rơbêh 100 phun kyâo hơngo pơkŏn amăng kual arăng pruai, tuh ia jrao kiăng phun djai tui amăng ƀrư̆. Ră anai bruă anai glăk hơmâo anom apăn bruă ječ ameč hơduah ĕp, ngă rơđah.

“Gơmơi pơsit blung a lĕ kual anai ƀu amuñ hơmâo mơnuih mut nao ôh anun hyu tir hui mơn. Yua ƀu pơmin ôh kual anun hơmâo arăng nao anun jing kaih ƀuh. Bơ arăng phă glai prai rưng či ngă hơget lĕ juăt ñu nao lăng pơ anih arăng phă ta thâo mơtăm yơh, samơ̆ hăng bruă phă glai tal anai ăt aka ƀu thâo pơsit mơn. plơi prong glăk git gai anom bruă kông an hăng hơdôm anom bruă bơdjơ̆ nao pơƀut hyu ĕp mơnuih drôm kyâo či bơtơhmal tui tơlơi phiăn. Laih dong khŏm thâo yua hơget gơñu phă glai rưng”.

Ƀơi anăp kơđi tơlơi prong tui anai, lơ 17/5, Jơnum min mơnuih ƀon sang tơring čar Lâm Đồng hơmâo hră git gai hơdôm anom bruă ječ ameč hơduah ĕp, bơtơhmal, lăi pơthâo rơđah bruă koh drôm kyâo ča čot anai. hrŏm hăng anun, rơngiao kơ kiăng anom bruă wai lăng glai prăp rơmet bruă pla glai, pơlar glăi glai rưng mơtăm ƀơi anih arăng drôm, Jơnum min mơnuih ƀon sang tơring čar Lâm Đồng ăt git gai Khua Jơnum min mơnuih ƀon sang plơi prong Đà Lạt brơi hơdôm anom bruă, mơnuih mă bruă lăng glăi tơlơi soh mơng ƀing gơñu đah mơng bơtơhmal tui tơlơi phiăn.

       Quang Sáng: Čih - Siu H’Mai: Pơblang