Tui hăng tơlơi rơkâo, jơlan anai yap anŏ glông ataih truh 122 km, anih tơkuh hăng jơlan đuăi hmar mơ̆ng kơdư nao pơ dơnung gah ngŏ, anih tơkuh ƀơi rơnuč lĕ tơkuh hăng jơlan 14; anŏ prong păng jơlan čuk pơkra djop 4 boh rơdêh nao hrŏm sa amăng plĕ, rơnoh hmar pơkă rơdêh đuăi truh 100 km lơ̆m sa mông, hơmâo jơlan pơkă pioh anih rơdêh jưh sit hơmâo tơlơi ječ ameč. Rơnoh prăk tuh pơ alin truh 29.000 klai, aka ƀu jŭ yap hăng rơnoh prăk kơmlai čan ôh amăng thun blan čuk pơkra jơlan.

Bruă prăp lui gơnam tuh pơ alin him lăng pok pơhai mơ̆ng thun 2025-2026; čuk pơkra mơ̆ng thun 2026 hăng amra giong lĕ truh thun 2029. Jơlan rơdêh đuăi hmar Phú Yên-Dak Lak ƀu kơnong pok brơi anŏ gêh găl pơdŭ pơgiăng gơnam hăng tuai rô nao rai mơ̆ng Phú Yên pơtruh pơ hơdôm dêh čar amăng kual ia krông Mekong đôč ôh, dŏ pơtrut bruă mă pơdŭ pơgiăng sĭ mơdrô gơnam boh čroh đang hmua kah hăng kơphê, tiu, boh durian (sầu riêng)....ba nao pơ djop tơring čar kual ter hang ia rơsĭ Dơnung Tong krah.