VOV4.Jarai - Mơguah lơ 14/4, ƀơi Hà Nội, Ping gah Khul hơdôm Ƀirô Kơnuk kơna pơphun Jơnum Grŭp mă bruă tal 8, bơkơtuai bôh tơhnal bruă mă 3 blan tal 1 hăng pok pơhai hơdôm bruă mă phun mơng 3 blan tal dua thun 2022. Amăng mông jơnum, ƀing khua pơ ala hmâo kơsem min, bơkơtuai gum pơhiăp amăng hơdôm bôh yôm kơ Hră čih tơlơi lăi pơthâo glăi bôh tơhnal 5 thun ngă tui Tơlơi pơtrun pơsit mrô 06 mơng Ping gah Khul kơ “Kơtưn tơhnal ba jơlan hlâo, ngă gru hlâo mơng mơnuih apăn bruă, mơnuih ping gah, biă ñu lĕ mơnuih apăn akô̆ gưl Ping gah, ƀirô anom bruă amăng tơlơi ră anai; Hră čih pơkra 5 thun ngă tui tơlơi pơtrun pơsit mrô 04 mơng Ping gah Khul kơ “Pơđĭ bôh tơhnal bruă pơtô ba mơnuih ƀôn sang mơng ping gah hơdôm ƀirô kơnuk kơna”. Hrom hăng bruă pơtô pơblang bruă kơđi čar dưi kơtưn đĭ lĕ bruă pơgang tơlơi pơmin mơng Ping gah, hrưn đĭ hơngah hơdôm tơlơi pơmin ƀu djơ̆, kơdŏng glăi dưi pơtrut kơtang, djru pơdŏng khul ping gah hăng glông bruă kơđi čar ƀơi Ping gah Khul klă hiam, kơjăp kơtang./.

Siu H’ Prăk: Pơblang