Tơdơi kơ ha wŏt hrơi tơjuh pok pơhai bruă mă tui hơbô̆ bruă gong gai dua gưl, bruă mă ƀơi tơring čar Gia Lai hơmâo pok pơhai hruaih. Bruă ngă hră pơ-ar lăng nao rai mơng ataih hơmâo pok pơhai tŭ yua, mơ̆ bưp sa, dua tơlơi gun amăng bruă tô nao rai plang internet hăng gơnong glông. Sit biă ñu, bruă ngă hră pơ-ar brơi mơnuih ƀôn sang ba glăi boh tŭ yua. Hrŏm hăng hơdôm boh tŭ yua blung a, tơring čar ăt dong ƀơi anăp lu tơlơi tơnap tap, tơlơi lông lơm lŏn mơnai prong rơbêh 21.000 km karê-dong tal 2 đơ đam dêh čar, mrô mơnuih dong tal 10.

Gia Lai kiăng git gai klă, kiăo tui bruă wai lăng kơnuk kơna, laih dong pơhlôm rơnuk rơnua-hơđong. Ơi Hồ Quốc Dũng-Khua git gai Ping gah tơring čar Gia Lai brơi thâo; ƀơi anăp kơ tơlơi sit nik anun, tơring čar akŏ pơdong anom bruă mă mrô 2 ƀơi Pleiku hăng jao bruă brơi Kơ-iăng Khua git gai Ping gah tơring čar, sa kơ-iăng Khua Jơnum min mơnuih ƀôn sang tơring čar nao git gai anom mă bruă kiăng pơhlôm brơi ngă bruă klă, hruaih hăng tŭ yua.