Tơlơi pơhing anai hơmâo lăi amăng jơnum klah čun 10 thun ngă tui tơlơi črâo trun mrô 05 mơng Ding jum kơđi čar hăng lăng glăi bruă pel ĕp, krăo lăng, bơtơhmal mơnuih Ping gah ngă soh rơwang thun 2020-2025 yua Ping gah tơring čar Lâm Đồng pơphun. Hăng pran jua ƀu hơmâo “anih kŏm”, ƀu hơmâo hlơi gah rơngiao, rơwang thun 2020-2025, Ping gah tơring čar, Khul apăn bruă Ping gah, gưl Ping gah, jơnum min pel ĕp djop gưl amăng tơring čar Lâm Đồng hơmâo đing nao git gai, črâo ba hăng pơphun ngă tui khut khăt bruă pel ĕp, krăo lăng hăng tơlơi bơtơhmal mơng Ping gah. Bruă pơsir khut khăt ƀing mơnuih Ping gah ngă soh ba glăi tŭ yua amăng bruă pơtô pơjuăt, pơgăn bruă ngă soh amăng khul Ping gah hăng ƀing apăn bruă, mơnuih Ping gah.

Samơ̆, ơi Y Thanh Hà Niê Kdăm, Khua git gai Ping gah tơring čar Lâm Đồng brơi thâo, sa, dua tal pel ĕp, krăo lăng ăt aka tong ten, ngă tui hơđăp; boh tơhnal pel ĕp, krăo lăng dŏ hrŏm đôč, ƀu lăi nao hơdôm anŏ aka ƀu klă, tơlơi soh glăi kiăng pơsir, pơplih pơkra, ba truh aka ƀu ba glăi tŭ yua; rơkâo djop gưl Ping gah, grup Ping gah lăng glăi, ječ ameč ba tơbiă hơdôm hơdră pơsir hĭ pơ anăp anai.