VOV4.Jarai - Kơnong amăng 1 wơ̆t hrơi tơjuh rơgao đôč, plơi prong Buôn Ma Thuột, Dak Lăk hơmâo 2.482 čô mơnuih ƀă klin Covid-19, amăng anun hơmâo 2.245 čô mơnuih ƀă amăng plơi pla. Ƀơi anăp tơlơi hŭi rơhyưt mơng klin ngă, tlam lơ 22/2, plơi prong ngă hră lăi pơthâo mrô 524 kơ bruă pơgang klin Covid-19 ƀơi plơi prong dong mơng 6 mông lơ 23/2/2022 truh kơ hrơi hơmâo tơlơi lăi glăi phrâo. Tui anun, plơi prong Buôn Ma Thuột kiăng pơdơi hĭ bruă sĭ mơdrô amuñ ƀă klin kah hăng vũ trường, karaoke, mátxa, kuan ƀar, Internet, anih ngui điện tử), hơdôm anih pơhrup ngă hiam kah hăng ngă tơkâo, pik ia phong, pơhrup hiam ƀô̆ mơta, spa...Pơdơi bruă pơtô hrăm pơ sang hră hăng čơđai mầm mon hăng pơtô hrăm mơng ataih hăng čơđai gưl sa, anih 6,7,8 hăng anih 10, 11. Hơjăn čơđai sang hră anih 9 hăng anih 12 hăng hơdôm anih pơtô hrăm pơkŏn ƀơi plơi prong pơphun hrăm pơ sang hră samơ̆ khŏm hơmâo: pơhlôm rơnuk rơnua amăng bruă pơgang klin Covid-19; nai pơtô gưl prong, čơđai sang hră gưl anet, prong pơtô hrăm khŏm hơmâo tlâ̆o djŏp 2 ară vaccine ƀudah suaih laih klin Covid-19 ƀu rơgao 6 blan.

Čơđai gưl sa hăng anihb 6,7,8 hrăm mơng ataih dong či pơgang klin

Yap truh mông anai, plơi prong Buôn Ma Thuột hơmâo 7.540 čô mơnuih ƀă klin Covid-19, amăng anun hơmâo 2620 čô mơnuih pơjrao suaih laih. Buôn Ma Thuột ăt jing kual hơjăn ñu yơh pơkă mriah ƀlơk (vùng cam) ƀơi Dak Lăk (ƀă klin kơtang).

Siu H’Mai: Pơblang