VOV4.Jarai - Lơ 11/3/2022, Ƀirô Gong phun jua pơhiăp dêh čar Việt Nam ƀơi Dăp Kơdư hrom hăng gong gai plơi pla hăng sang anô̆, mơnuih amăng sang anô̆, ƀing gop hmâo ba laih drơi jăn Pô pôr pơhing Kpă Simon, Kơ-iăng Khua hơđăp Gong phun jua pơhiăp dêh čar Việt Nam ƀơi Dăp Kơdư nao pơ̆ anih pơdơi dă tuč rơnuč ƀơi să Čư̆ Mô̆, tơring glông Ia Pa, tơring čar Gialai.

Mông jôk atâo Pô pôr tơlơi pơhing Kpa Simon

Lom 3 mông 20 mơnit čơtlăm lơ 9/3/2022, Pô pôr pơhing Kpă Simon, Kơ-iăng Khua hơđăp Gong phun jua pơhiăp dêh čar Việt Nam ƀơi Dăp Kơdư, yua kơ tơlơi ruă kraih hmâo rơngiă laih. Ñu tơkeng lơ 3/8/1959, hơdip 63 thun, hmâo rơbêh kơ 25 thun tuh rơyuh pran jua kơ bruă pơtui jua pơhiăp 6 tơlơi pơhiăp djuai ania ƀiă Dăp Kơdư ƀơi Ƀirô gong phun jua pơhiăp dêh čar Việt Nam pơdŏng ƀơi Dăp Kơdư, mơng pơblang, pơtui jua pơhiăp hăng tơlơi Jarai, truh bruă apăn wai lăng.

Sang anô̆, ƀing gŏp Pô pôr pơhing Kpă nao pơ̆ anih pơdơi dă ƀơi plơi pla ñu Čư̆ Mô̆, Gialai

Hăng adơi ayong mă bruă hrom, ñu jing pô jê̆ giăm, pơđao pran jua, jing gru ba jơlan hlâo gah bruă mă, gir run hơduah ĕp bôh thâo, khăp kơ bôh thâo đưm djuai ania Dăp Kơdư, gir run na nao djă pioh bôh pơhiăp, bôh hră čih truh kơ hơdôm gru grua bôh thâo pha ra, hơdôm tơlơi adôh đưm hmư̆ mơ-ak. Hăng jơlan hơdră pơtui jua pơhiăp hăng tơlơi djuai ania ƀiă Dăp Kơdư, ñu hmâo pơñen laih, pơsit pơtŏng rim glông tơlơi čih, ruah mă tŏng ten rim črăn tơlơi adôh kiăng glit nao hrom. Hăng hơdôm gơyut hmư̆ brô̆ giăm ataih, anăn Kpă Simon juăt biă hăng plơi pla ataih jê̆, djop kual Dăp Kơdư, čih djă pioh hơdôm thun blan yua kơ đok pơhiăp mơ-ak mơng ñu, pơdah hăng tơlơi čih pha ra ƀơi glông pôr pơhing.

Rơgao rŏng lŏn tơnah, tơdơi kơ hơdôm thun dô̆ mă bruă ƀơi Buôn Ma Thuột, tơring čar Daklak, ñu hmâo pơwot glăi pơdơi pơdă ƀơi anih ñu tơkeng rai ƀơi tơkai Čư̆ Mô̆, Bến Mông mơng Ia Pa (gah tơring glông Ia Pa, Gialai)

Siu H’ Prăk: Pơblang