VOV4.Jarai-Sui mơ̆ng anai 55 thun lơ 24/6/1967, Việt Nam hăng Kur sit nik akŏ pơjing bruă ngă giăng mah pơtom hiăp hăng hrơi anun mut tơma amăng gru phun čih pioh kơ dua boh dêh čar kah hăng tơlơi lăp hơdor pioh prong prin hing ang, pok rai sa hơdră phrâo amăng bruă ngă giăng mah, jĕ giăm lir hơbit kơ dua bơnah djuai ania dêh čar ieo gah.

Mah bưp lu tơlơi lông lăng amăng bruă gru čih pioh hăng lu tơlơi rung răng rơnuk blah ngă, tơlơi giăng mah Việt Nam-Kur ăt jai hrơi pơđĭ kyar kjăp phik, tong ten, dưi hơmâo hơdôm rơnuk khua mua hăng mơnuih ƀôn sang dua bơnah ƀu pơdơi ôh pơbŭ đĭ, djă pioh, jing kah hăng kông ngăn dram gơnam yôm ƀu hơmâo rơnoh mơ̆ng dua bơnah djuai ania.

55 thun lĕ sa rơwư̆ rơwang aka ƀu sui ôh pơkă hăng gru kơpal hrơi čih pioh bruă ngă giăng mah mơ̆ng dua bơnah djuai ania, samơ̆ sa črăn hơmâo boh yôm hloh phara biă mă amăng tơlơi rô nao rai mơ̆ng dua bơnah. Anun lĕ, rơnuk mơ̆ mơnuih ƀôn sang Việt Nam hăng Kur adơi ayong dŏ jĕ na nao amăng bruă mă hơkrŭ kơ lŏn ia pơklaih rơngai djuai ania laih anun hrom hơbit akŏ pơjing lŏn ia rơnuk rơnua, mơnuih ƀôn sang trơi pơđao yâo mơak.

Khua ding jum pơtom hiăp Việt Nam ơi Bùi Thanh Sơn

Tơlơi khăp gum pơgôp, tơlơi khăp jĕ giăm tong ten pran jua djru nao rai mơ̆ng dua bơnah djuai ania ƀing ta jing pran kơtang pơtrut dua boh dêh čar ngă hrom djru blah pơrai ayăt sat ƀai pơdjai ană mơnuih mơnam đut djuai Pol Pôt, kiăng ba lŏn ia hơmâo lu pra yang Kur rŭ glăi tơlơi hơdip laih anun tơlơi ngă giăng mah dua bơnah pơđĭ kyar kơtang tit kah hăng ră anai. Nai prin tha, Kin Phea, Kơ-iăng Khua anom kơsem min dêh čar Kur lăi lĕ:

“Tơlơi ngă hrom, gum pơgôp, giăng mah hăng djru ba mơ̆ng tơhan pơyơr pran jua Việt Nam pioh kơ dêh čar Kur hơmâo rơnoh yôm biă mă kơ gru phun čih pioh na nao hing ang laih anun ƀu hơmâo anŏ hơgĕt dưi lŏm hĭ ôh. Tơlơi djru ba mơ̆ng Việt Nam hăng tơdron blah tơlơi gum pơgôp pơklaih rơngai lŏn ia Kur yôm biă mă, djru pơtrut bruă blah pơblư̆ hĭ kơnuk kơna ƀrưh hmiah Khmer mriah laih anun man pơdong glăi lŏn ia dêh čar Kur".

Hơdôm boh tơhnal mơ̆ Việt Nam hăng Kur dưi ngă hrom amăng 55 thun laih rơgao, ƀu kơnong sa tơlơi dưi mơ̆ng tơlơi blah ngă hơkrŭ pơklaih rơngai lŏn ia djuai ania đôč ôh, dŏ jing gru grua bruă mă anŏ pơtrut pơđĭ kyar tơlơi giăng mah amăng lu bruă mă, man pơdong lŏn ia hăng pơđĭ kyar dêh čar. Amăng dua thun rơgao, mah klin kheng Covid 19 bơbeč djơ̆ ngă tơnap kơ bruă pơđĭ kyar ƀơi rĭm dêh čar, samơ̆ tơlơi ngă giăng mah Việt Nam-Kur ăt ƀu pơdơi ôh pơđĭ kyar na nao. Dua bơnah gum tơngan hrom pơhlôm pơgang klin tŭ yua, djru nao rai hăng lu hơdră wơ̆t gơnam tam hăng pran jua, gơnam yua gah ia jrao, prăk kăk, vaccine.

Khua ding jum ling tơhan dêh čar Kur ơi Tea Banh hăng Khua ding jum ling tơhan

Việt Nam ơi Phan Văn Giang

Dua bơnah ngă hrom re se, kah pơpha tơlơi pơhing hmao kru laih anun dong yua djru nao rai amăng mông jơnum prong jar kmar hăng amăng kual, boh nik ñu amăng bruă ngă hrom mơ̆ng Khul gum hơbit djop dêh čar dơnung ngŏ ASIA, juăt lăi kual ASEAN, dong yua amăng sang bruă gum hơbit djop dêh čar hăng lu tơlơi phiăn ngă hrom amăng kual ia krông Mekong.

Hăng bruă ngă djă pioh, pơbŭ tui mơ̆ng dua bơnah mơnuih ƀôn sang, tơlơi giăng mah Việt Nam-Kur ră anai pơđĭ kyar tŭ yua biă mă tui jơlan hơdră anăn “Lŏn ia ieo gah jĕ giăm hiam klă, giăng mah gru grua, ngă hrom hlom bom, kjăp hơđong sui thun”. Khua anih jưh pơ ala Việt Nam ƀơi dêh čar Kur, ơi Nguyễn Huy Tăng lăi pơtong:

“Ƀing ta ăt pơtrut ngă hrom kơtang hloh amăng bruă kơđi čar pioh pơgang kjăp anăp ngă bruă hrom abih bang lơ̆m ngă giăng mah dua bơnah, pơtrut kơtang bruă mă pơtô hrăm mơnuih ƀôn sang djop gưl dua bơnah, boh nik ñu rơnuk ană tơčô tơdơi thâo hluh kơ tơlơi gơgrong, boh yôm amăng bruă mă jĕ giăm giăng mah Việt Nam-Kur ăt kah hăng boh tŭ yua yôm tơlơi hơdip mơda anŏ gơgrong pioh anai.

Kiăng mơ̆ng anun, ngă kjăp tui, pơđĭ kơtang tơlơi đăo kơnang kơđi čar, pơjing rai atur kơ tơlơi ngă giăng mah mơnuih mơnam hơđong kjăp, kơtưn rô nao rai dua bơnah dêh čar. Hrom hăng anun, pơtrut ngă hrom amăng bruă pơgang rơnuk rơnua lŏn ia hăng pơtom hiăp. Anai yơh hơdôm tơmeh phun yôm amăng bruă ngă giăng mah, djru djă bong kjăp anŏ ngă pơđĭ kyar mơ̆ng dua bơnah lŏn ia. Laih anun yôm hloh dơ̆ng pơtrut ngă hrom bơwih ƀong huă, pơjing rai pran kơtang phrâo, bruă ngă pơgang brơi anŏ pơđĭ kyar hơđong kjăp tơlơi giăng mah Việt Nam-Kur”.

Lơ 24/6/1967, jing hrơi lăp hơdor pioh amăng gru phun tơlơi ngă giăng mah gum pơgôp, giăng mah gru grua jĕ giăm dua bơnah dêh čar Việt Nam hăng Kur. Tơlơi gum pơgôp giăng mah gru grua kơplah wah mơnuih ƀôn sang dua bơnah Việt Nam hăng  Kur 55 thun rơgao djru hrom yôm biă mă hơdôm boh tơhnal dưi ngă laih mơ̆ng rĭm boh dêh čar, jing atur, gru phun kjăp pioh kơ dua bơnah djă lui hăng pơđĭ kyar na nao ră anai truh pơ dĭ da gla kơñ.

Khua git gai Ping gah ơi Nguyễn Phú Trọng hăng pơtao dêh čar Kur ơi Norodom Sihamoni

Tơlơi ngă giăng mah mơ̆ng dua bơnah jai hrơi ƀuh rơđah amăng bruă ngă hrom, hlăk ngă tui hăng dưi hơmâo khua mua laih anun mơnuih ƀôn sang dua bơnah pơbŭ đĭ na nao, pioh kơ djop rơnuk hlăk ai čơđai muai dua bơnah thâo hluh rơđah rơđong hăng pơtrut man pơdong kah hăng tơdrông tua pơtruh brơi bruă ngă giăng mah. Sum So Phonl, čơđai sang hră gưl prong hơđăp sang hră gưl prong Prea Say Ha Mu Ni Ria pơdah pran jua:

“Kâo hok mơak biă hăng pơ-ư ang yua lŏn ia gơmơi hơmâo akŏ pơjing tơlơi giăng mah adơi ayong gum pơgôp hăng Việt Nam. Tơlơi khăp giăng mah gơyut gơyâo anai hơmâo djru kơ 2 boh dêh čar ƀing ta rơnuk rơnua, hơđong hăng pơđĭ kyar. Hơdôm boh dêh čar jĕ giăm ieo gah khom kơnang nao rai hnun kah thâo pơđĭ kyar hơđong kjăp. Ƀing hlăk ai kah hăng gơmơi khom gơgrong ba djă pioh tơlơi ngă giăng mah yôm phara anai”.

Mơñum ia sa hnoh krông Mekong, Việt Nam hăng Kur hơmâo hrom sa bưng bôt tơlơi hơdip. Hơdôm boh tơhnal yôm dua bơnah hơmâo tŭ mă, tơlơi gum hrom tơma dơlăm, prong prin hăng tŭ yua  amăng 55 thun rơgao jing hơdôm tơlơi pơtruh nao rai tơlơi pơhing rơđah rơđong laih hăng tum teč hloh, hok mơak kơ bruă ngă giăng mah, ngă hrom Việt Nam-Kur.

Phùng Kiên hăng Văn Đỗ VOV pơ dêh čar Kur čih-Nay Jek: Pơblang