VOV4.Jarai-Ƀơi Hà Nội, Khul wai lăng Tơlơi rơnuk rơnua, Khua mua pơphun tal pơplông pơrơguăt drơi jăn kual Ngŏ dơnung ASIA tal 31, iâu klah čun SEA Games 31 hăng khul pơgang tơlơi rơnuk rơnua SEA Games 31 mơ̆ng Ding jum kông an, jơnum pơƀut glăi bruă mă pơgang tơlơi rơnuk rơnua hơđong kơ SEA Games 31.

 Ngă tui akŏ bruă pơgang tơlơi rơnuk rơnua abih bang tal pơplông, akŏ pơjing Khul wai pơgang tơlơi rơnuk rơnua hơđong SEA Games 31; pok pơhai lu hơdră, jơnum pơƀut glăi bruă mă pơgang tơlơi rơnuk rơnua mông pok jơnum, pơđut jơnum pơplông hăng hơdôm wơ̆t pơplông ta rơnuč čưng boh lông grup đah rơkơi, grup đah kơmơi; pơphun hyu ĕp, krăo lăng bruă mă pơgang tơlơi rơnuk rơnua ƀơi 6 bit anih pơphun ƀơi tơring čar, ƀôn prong.

Ƀơi mông jơnum, Kơ-iăng Khua Ding jum kông an, ơi Lương Tam Quan rơkâo djop ding jum anom bruă, tơring čar, ƀôn prong ăt đing nao, djru ba, ngă gêh găl, gum hrom Ding jum kông an amăng bruă pơgang tơlơi rơnuk rơnua hơđong lăi hrom, pơgang tơlơi rơnuk rơnua djop bruă mă kơđi čar, gru grua hiam yôm kơ lŏn ia lăi pha; đing nao akŏ pơdong bruă ling tơhan kông an mơnuih ƀôn sang ngă tui hơdră mă bruă tơpă, hơđong kjăp, kơhnăk, rơgơi, phrâo hloh, kiăng ngă giong bruă jao amăng tơlơi pơhing phrâo.

Nay Jek: Pơblang