VOV4.Jarai - Lơ 19/5, ƀơi plơi prong Pleiku pơphun pơdă prưng “hơdôm tơlơi dưi ngă gah kơđi čar, bơwih ƀong huă, gru grua mơng tơring čar Gia Lai”. Hrơi pơdă prưng pơphun brơi rơwang hrơi tơjuh hơdôm bruă čơkă 90 thun hrơi akŏ pơdong tơring čar Gia Lai, hơmâo pơphun mơng anai truh abih lơ 25/5. Hăng 240 pok rup, hră pơ-ar, hlăk lơkak hơmâo pơdă pơ lan Sang gru grua tơring čar Gia Lai, Pơdă prưng “Hơdôm tơlơi dưi ngă gah kơđi čar, bơwih ƀong huă, gru grua mơng tơring čar Gia Lai” pơƀut amăng 4 mơta bruă phun anun lĕ: Anih gru đưm Rộc Tưng - Gò Đá; Anih gru đưm dêh čar Tây Sơn Thượng Đạo; Anih djă pioh sinh quyển Cao nguyên Kon Hà Nừng hăng Hơdôm tơlơi dưi ngă gah bơwih ƀong, mơnuih mơnam mơng Gia Lai amăng 90 thun akŏ pơdong hăng pơđĭ kyar.

Mơnuih ƀon sang plơi prong Pleiku nao lăng anih pơdă prưng

Amăng anun, lăp đing nao lĕ lu rup yôm pơƀuh anih hơkrŭ K10, sa dua tơlơi blah dưi prong mơng tơhan hăng mơnuih ƀon sang Gia Lai amăng rơnuk blah ayăt Mi hăng tơlơi hơdip mơda mơng mơnuih ƀon sang Gia Lai amăng hơdôm thun blung a tơdơi kơ tlaih rơngai lŏn ai 1975.

Siu H’Mai: Pơblang