VOV4.Jarai - Ƀrô hrơi pioh hơdor glăi 47 thun hrơi pơklaih rơngai tơring čar Kon Tum (16/3/1975-16/3/2022), 69 thun hrơi gru grua phĭn rup Việt Nam, tlam lơ 15/3, ƀơi gong kut blah dưi ƀơi tơdron lăk tơring kual Măng Đen, tơring glông Kon Plông, Khul rơgơi čih boh pia - adôh suang tơring čar Kon Tum gum hrŏm hăng Jơnum min mơnuih ƀon sang tơring glông Kon Plông pơphun hrơi pơdă prưng rup.

Mơnuih ƀon sang hăng tuai nao lăng rup amăng hrơi pơdă prưng

Hrơi pơdă prưng rup rap yua Khul rơgơi čih boh pia - adôh suang tơring čar Kon Tum gum hrŏm hăng Jơnum min mơnuih ƀon sang tơring glông Kon Plông pơphun kiăng lăi pơthâo 120 pok rup mơng 12 čô mơnuih phĭn rup. Anai lĕ hơdôm pok rup hơmâo ba nao pơplông gưl gơnong glông hăng amăng kual. Amăng anun lu pok rup dưi mă pri  amăng tal pơplông pơphun amăng lŏn ia hăng tač rơngiao. Hrơi pơdă prưng pơphun mơng lơ 15 truh pơ lơ 25/3 - ăt ƀrô amăng hơdôm hrơi pơphun hrơi adôh tơlơi adôh dưm mơng djop djuai ania kual Trường Sơn - Dap kơdư tal III thun 2022 hăng pok glăi hơdôm anih bơwih brơi tuai čuă ngui amăng tơring čar yua anun amra ba glăi lu tơlơi dưi prong.

Siu Đoan: Pơblang