VOV4.Jarai - Amăng hơdôm hrơi rơgao ƀơi guai hơdôm boh tơring čar kual Dap Kơdư pơphun lu bruă ngă lơphet hơdor glăi Hrơi abih bang pơgang guai dêh čar lơ 3/3, ngă pơhưč lu mơnuih ƀon sang djŏp djuai ania ƀơi tơring čar gum ngă. Ƀơi kual guai dêh čar 2 boh tơring čar Dak Lăk hăng Dăk Nông, Anom bruă git gai tơhan pơgang guai 2 boh tơring čar hơmâo brơi gơnam djơ̆ hăng tơlơi kiăng, juh alum mơnuih ƀon sang ƀơi guai dêh čar gir pơgang ba guai dêh čar ta.

Tơring čar Dak Lăk hơmâo jơlan guai glông rơbêh 73 km ha mơguai hăng tơring čar Mondulkiri, dêh čar Kur. Kual lŏn hơmâo guai dêh čar ƀơi Dak Lăk hơmâo 4 boh să, ƀơi 2 boh tơring glông Buôn Đôn hăng Ea Súp, jing anih hơdip mơng rơbêh 22.000 čô mơnuih gah 26 phung djuai. Thun 2021, ping gah, gong gai hơdôm boh tơring čar hơmâo ngă hrŏm kơjăp hăng Ling tơhan pơgang guai pơgang ba kơjăp kual lŏn, rơnuk rơnua ƀơi guai, ngă hơđong kơjăp amăng plơi pla, huăi hơmâo tơlơi rung răng. Rơđah biă ñu, ƀơi hơdôm boh să gah guai dêh čar, hơmâo laih 26 grup, rơbêh 480 akŏ sang, rơbêh 1.600 čô mơnuih čih anăn rơkâo wai lăng jơlan guai, gong guai dêh čar. Rơngiao kơ anun, mơnuih ƀon sang ƀơi 51 boh plơi pla kĭ hră gum pơgăn glăi tơlơi ngă soh sat.

Khua mua tơring glông Ea Súp, Dak Lăk brơi gơnam kơ hơdôm puih kơđông tơhan.

Tui hăng yă Trần Lệ Thủy, Khua git gai Ping gah să Ia Rvê: Bruă “Abih bang mơnuih ƀon sang gum pơgang kual lŏn, rơnuk rơnia guai dêh čar amăng rơnuk anai” pơtrut tui laih pran jua rơkâo ngă bruă mă pô mơng mơnuih ƀon sang, hyu tir, pơgăn hĭ tañ hơdôm bruă ngă soh tơlơi phiăn:“Hrơi blan giăm anai, neh met wa ngă tui klă laih tơlơi phiăn guai dêh čar. Bruă ngă soh tơlơi phiăn guai dêh čar kah hăng koh drôm, đom bua lua bơnah ăt plai mơn.  Neh met wa thâo hluh tui, rim čô mơnuih jing gong tơmeh hơdip pơgang ba rơnuk rơnua ƀơi guai. Ƀu kơnong neh met wa thâo hluh huăi ngă soh tơlơi phiăn đôč ôh nehmet wa yơh pô dŏ krăp lăng sŭ, dŏ pơhmư̆ lăi pơthâo glăi kơ ping gah, gong gai plơi pla ăt kah hăng puih kơđông tơhan lơ̆m hơmâo arăng mut nao, găn nao rai pơ jơlan guai dêh čar”.

Hrơi jơnum ngui Tơhan pơgang guai ƀơi Dak Nông.

Tơring čar Dak Nông hơmâo jơlan guai glông rơbêh 140km, ha mơguai hăng tơring čar Mundulkiri (dêh čar Kur), găn nao kual hơmâo 7 boh să gah guai lŏn ia. Amăng hrơi jơnum ngui abih bang mơnuih gum pơgang guai dêh čar hơmâo pơphun ƀơi să hơmâo guai lŏn dêh čar, hrŏm hăng hơdôm bruă adoh suang tui gru djuai ania, ƀing khua hơmâo lăi nao hơdôm tơlơi dưi ngă, tơlơi thâo thăi amăng bruă bơkơtưn apah bơni amăng plơi pla. Hmư̆ hing kah hăng ƀơi să Thuận An, tơring glông Dak Mil, 6 grup wai lăng mă jơlan guai gir ngă hrŏm hăng  ling tơhan pơgang jơlan guai, gong guai dêh čar ta. Thun laih rơgao, lu sang anŏ ƀơi anai brơi lŏn tơnah, brơi mă yua dơdăng đang hmua kiăng ƀing khua, ling tơhan pơdong anih dŏ gak, pơgăn arăng nao rai ča čot hăng pơgang klin Covid-19.

Amăng Hrơi jơnum ngui abih bang mơnuih ƀon sang pơgang guai ƀơi să Thuận An, Anom bruă git gai tơhan pơgang guai tơring čar Dak Nông hơmâo brơi Mơđai “Yua tơlơi dưi wai lăng lŏn ia, rơnuk rơnua guai dêh čar” kơ sa čô mơnuih hơmâo gum pơgôp prong amăng bruă wai lăng, pơgang ba tơlơi dưi lŏn ia, rơnuk rơnua jơlan guai dêh čar. Jơnum min djŏp djuai ania mơnuih mơnam Việt Nam tơring čar Dak Nông hăng Tơhan pơgang guai tơring čar brơi 2 boh sang gum pơgôp kơ hơdôm boh sang anŏ tơnap tap. Pơ ala kơ gong gai tơring čar brơi hră bơni kơ khul grup, mơnuih mă bruă rơgơi, gum djă bong rơnuk rơnua hơđong kơjăp ƀơi guai dêh čar thun 2021; brơi gơnam pơpŭ kơ ƀing mơnuih arăng juăt gơnang, sang anŏ rin ƀơi să Thuận An. Ling tơhan pơgang guai Dak Nông brơi 7 anung gơnam kơ ƀing čơđai sang hră amăng jơlan hơdră “Čung ba adơi nao sang hră” hăng “Ană rông ƀơi puih kơđông tơhan pơgang guai” ƀơi Thuận An./.

Siu H’Mai: Pơblang