VOV4.Jarai - Sa amăng hơdôm jơlan gah yôm phăn kiăng hơkrŭ glăi bruă bơwih ƀong lĕ pơtrut pơđĭ prăk brơi čan, ba mut hơdôm jơlan bruă đing nao hlâo, yôm phăn. Čang rơmang kơ bruă hơkrŭ glăi bơwih ƀong, lu sang prăk glăk ba tơbiă tơhnal pơkă pơđĭ ƀiă biă mă ñu mơng 20-30% amăng thun anai biă ñu hluai tui kơ bruă sĭ mơdrô raih daih, brơi čan kơ rim mơnuih, brơi čan lŏn sang.

Tui hăng mrô mơng Sang prăk Kơnuk kơna, prăk brơi čan truh rơnuč blan 2 đĭ 1,82% bơhmu hăng rơnuč thun 2021. Ăt tui hăng mrô mơng Sang prăk Kơnuk kơna mơn, rơnuč thun 2021, mrô prăk brơi čan hmâo 10,44 klăk klai prăk. Tui anun, amăng 2 blan akô̆ thun, sang prăk hmâo yua laih kơ bruă bơwih ƀong rơbêh kơ 190.000 klai prăk. Hlâo kơ anun, Sang prăk Kơnuk kơna brơi thâo, mrô prăk brơi čan hmâo đĭ năng ai ñu 2,74% amăng blan 1/2022, dưm dưm hăng đĭ giăm truh 286.000 klai prăk. Anai lĕ rơnoh lu hloh amăng 10 thun rơgao, lăi nao kơ rơnoh pơđĭ mrô hăng tơlơi kiăng prăk čan kơ bruă bơwih ƀong amăng blan akô̆ thun. Ƀing juăt bruă anai ăt ba tơbiă mơn tơlơi pơkă lăng hlâo klă kơ hơdră pơđĭ prăk brơi čan amăng thun anai. Tui hăng tơlơi lăi pơthâo glăi pơblang mơng Sang bruă bơwih ƀong prăk BSC, tơlơi kiăng čan prăk thun 2022 amra ƀơi rơnoh lu dong hăng amra đĭ 14%, dưi djru gum yua kơ bruă hơkrŭ đĭ dong bruă bơwih ƀong tơdơi kơ klin ruă. Rơngiao kơ anun, anung prăk djru yap him lăng 350.000 klai prăk amăng 2-3 thun pơ̆ anăp ăt djru pơđĭ mơn prăk brơi čan. Kơ-iăng Khua Sang prăk Kơnuk kơna Đào Minh Tú brơi thâo:

“Thun 2022 ƀing gơmơi amra git gai hơdră bruă prăk kak tui jơlan gah pơplih tañ, ngă gal brơi đut hlah kơ anom bơwih ƀong, djru pơsir bruă kơ bruă bơwih ƀong. Amăng bruă git gai hơdră bruă prăk ƀing gơmơi ăt amra lăng tui kơjăp mơn jơlan hơdră hơkrŭ glăi bơwih ƀong mơng Gong gai dêh čar, pơhlôm tơhnal wai lăng pơđĭ nua, hơđong bơwih ƀong prong, pơhlôm hơđong nua prăk, pơhlôm hơđong nua gơnam ăt kah hăng wai lăng abih anom bơwih ƀong prăk kak dêh car tač rơngiao, anih anom sĭ mơdrô mah”.

Gah mrô prăk yua kơ bruă bơwih ƀong, Sang prăk Kơnuk kơna ngă tui dong hơdôm bruă kiăng wai lăng bruă brơi čan prăk, nao hrom hăng pơđĭ klă bruă brơi čan prăk. Hrom hăng anun, sang prăk črâo ba pơphun brơi čan prăk pơđĭ mrô prăk čan pơhlôm, tŭ yua, đing nao brơi čan kơ hơdôm bruă bơwih ƀong huă, bruă đing nao tui hơdră pơtrun mơng Gong gai dêh čar, wai lăng kơjăp prăk brơi čan kơ hơdôm bruă amra bưp tơlơi ƀu tơphă kah hăng sĭ mơdrô lŏn sang, prăk, hơdôm rơwang bruă BOT, BT jơlan nao rai, kơtưn bruă wai lăng tơlơi ƀu tơphă hăng brơi čan prăk pioh kơ tơlơi hơdip mơda, prăk blơi prăp, ngă gal brơi kơ anom bơwih ƀong hăng mơnuih ƀôn sang dưi čan prăk sang prăk. Yă Hà Thu Giang, Kơ-iăng Khua wai lăng hơdră bruă prăk kak, Sang prăk Kơnuk kơna brơi thâo:

“Prăk brơi čan đing nao dong 5 mơta bruă gơñăm nao hlâo, hăng 5 bruă anai leng kơ hmâo rơnoh đĭ kyar prong hloh hơdôm bruă hrom, 5 bruă đing nao hlâo lĕ bruă đang hmua plơi pla, anom bơwih ƀong anet hăng găp ƀrô, sĭ gơnam kơ dêh čar tač rơngiao, măi mok djru gah tlôn hăng măi mok yôm leng kơ phun gơgrong mơng bruă bơwih ƀong, yua anun pơsit jơlan gah thun 2022 mơng sang prăk Kơnuk kơna ăt amra đing nao mơn prăk brơi čan kơ hơdôm bruă anai”.

Phrâo anai, Grŭp hyu mă bruă mơng sang prăk mơng Bruă Bơkơtuai anom bơwih ƀong Việt Nam (VBF) rơkâo Sang prăk Kơnuk kơna pel ĕp phru ƀiă prăk brơi čan pioh hơdôm sang prăk hmâo lu prăk brơi čan, djru hơdôm bôh anom bơwih ƀong, biă ñu lĕ hơdôm bôh anom bơwih ƀong anet hăng găp ƀrô lom kiăng. Bruă brơi čan prăk anai ƀu abih bang lĕ jơlan gah wai lăng, git gai prăk kak phrâo rơnuk anai, tui hơdră bơwih ƀong sĭ mơdrô ôh mơ̆. Jơlan gah mă yua prăk čan amra khom lui hĭ pơgi kơdih anai lom jơlan gah čan prăk ăt kah hăng hơdôm sang prăk sĭ mơdrô ngă djơ̆ tơlơi ba tơbiă mơng sa aih anom sĭ mơdrô pơđĭ kyar. Pô juăt bruă Nguyễn Trí Hiếu lăi lĕ amăng hơdôm blan pơ̆ anăp, pơkă lăng hlâo mrô kiăng prăk čan mơng anom bơwih ƀong tơdơi kơ klin ngă čang rơmang amra gal kơ mơnuih čan prăk hăng anom bơwih ƀong. Sang prăk Kơnuk kơna tâ̆o hloh lui hĭ room čan prăk kiăng rim sang prăk pơsit mă kơčăo bruă bơwih ƀong sĭ mơdrô mơng pô.  Ơi Nguyễn Thanh Tùng, Kơ-iăng Khua Sang prăk TMCP sĭ mơdrô hăng dêh čar tač rơngiao mơng Việt Nam Vietcombank pơsit brơi čan prăk dưi pơsit phrâo amra pioh djru bruă bơwih ƀong huă sĭ mơdrô, hơkrŭ glăi bơwih ƀong:

“Abih bang room brơi čan prăk sang prăk Kơnuk kơna brơi đĭ mrô prăk, Vietcombank amra pioh pơsit brơi čan prăk kơ hơdôm bruă či kiăng mơng bruă bơwih ƀong, djru bruă bơwih ƀong huă sĭ mơdrô ăt kah hăng tơlơi hơdip mơda mơnuih ƀôn sang mơn”.

Tơlơi lăi pơthâo glăi kơ bruă sang prăk phrâo anai mơng Sang bruă sĭ mơdrô Rồng Việt (VDSC) ăt pơsit mơn thun anai, hơdôm jơlan hơdră hơkrŭ glăi bơwih ƀong amra bơdjơ̆ nao klă kơ sang prăk. Hơdôm anung prăk djru jing yôm phăn biă amăng bruă pơhlôm pran đăo gơnang anom bơwih ƀong, pơplih bruă ba hyu hăng prăk hrom hăng anun hrŏ trun anô̆ ƀu klă mơng bruă brơi čan prăk hăng rơnoh tui hluai kơ rơnoh anet ƀudah prong, rơnoh kơtang ƀudah tơdu hăng bôh tơhnal mơng anung prăk pơtrut pơsur hăng jơlan hơkrŭ glăi. Lom bruă bơwih ƀong dưi pơplih amra plai biă tơlơi ƀu tơphă truh hăng prăk brơi čan mơng bruă bơwih ƀong. Mơng anun pơtrut hmâo hăng kiăng kơ čan prăk. Khă hnun hai, khua mua sa dua sang prăk ăt lăi mơn ăt dô̆ mơn hơdôm tơlơi ƀu tơphă amra truh kah hăng đĭ glăi nua gơnam tam, tơlơi hơkrŭ glăi mơng sa dua gơnong bruă ăt kaih mơn... samơ̆ lăng hrom, tơlơi čang rơmang đĭ kyar bơwih ƀong thun anai bơngač hloh thun hlâo. Sang prăk jing sa amăng hơdôm gơnong bruă dưi čang rơmang đĭ kyar klă hloh thun anai./.

            Vũ Bảo Ngọc: Pô čih – Siu H’ Prăk: Pơblang