VOV4.Jarai - Dŏng amăng hơdôm bruă mă hơdor glăi 30 thun hrơi pơdŏng bruă pơtom hiăp Việt Nam hăng Hàn Quốc, čơtlăm lơ 25/3 ƀơi plơi prong Sầm Sơn, tơring čar Thanh Hoá pơphun Jơnum “Pơbưp Hàn Quốc”. Hàn Quốc ră anai glăk jing pô tuh pơplai prong hloh amăng dêh čar Việt Nam hăng 9.200 rơwang bruă dô̆ tŭ yua; jing bơnah ODA, tuai čuă ngui, mơnuih mă bruă lu tal dua hăng bơnah sĭ mơdrô nao rai prong tal 3 hăng prăk pơhrui glăi mơng gơnam sĭ mơdrô nao rai dua bơnah hmâo 78 klai dolar Mi amăng thun 2021. Pơhiăp amăng mông Jơnum, Kơ-iăng Khua Ding jum pơtom hiăp dêh čar Việt Nam ơi Nguyễn Minh Vũ čang rơmang lu anih anom hăng anom bơwih ƀong amra ĕp ƀuh bơnah gum hrom djơ̆, lu tơlơi gum hrom kiăng hmâo bôh tơhnal hrưn đĭ pơđĭ prăk pơhrui glăi mơng gơnam sĭ mơdrô nao rai dua bơnah Việt Nam - Hàn Quốc truh 100 klai dolar Mi amăng thun 2023 hăng anăp nao tơhnal pơkă hmâo 150 klai dolar Mi amăng thun 2030. Kơnuk kơna Việt Nam pơkôl đing nao lĕ pơplih klă, pơplih mrô... hăng anai ăt lĕ anô̆ gal mơng hơdôm bôh anom bơwih ƀong Hàn Quốc./.

Siu H’ Prăk: Pơblang