Sang anŏ ơi Nông Minh Thước dŏ ƀơi plơi Đức An, să Thuận An, tơring glông Dak Mil, tơring čar Dak Nông hơmâo 2 hektar đang kơphê, thun anai him lăng pĕ pơhrui sĭ kơphê sang anŏ ñu hơmâo mơ̆n 800 klăk prăk. Hơdôm thun rơgao, ngă bruă pla kơphê boh hiam gum hrŏm khul ngă hrŏm rơnoh sĭ mơdrô yom hloh gah rơngiao mơ̆ng 500-700 prăk sa kg. Kiăng hơmâo rơnoh sĭ pơmă hơđong, ơi Nông Minh Thước khom ngă hmua pla kơphê ngă tui djơ̆ tơhnal pơkă kơphê boh hiam, asar lôm, kơphê khom tơsă truh 90% kah pĕ.

“Ră anai ngă kơphê tơguan tơsă lu lĕ yom yơh. Tơdah pĕ dŏ mơtah, sa lĕ ƀu djop ia jơman anŏ hiam ôh, dua lĕ huač biă mă. Mơnuih ƀôn sang ta ră anai tui hăng OCOP pơkă lĕ khom pĕ tơsă lu kah sĭ hơmâo rơnoh ƀiă”.

Hrŏm hăng ơi Thước, abih 114 boh sang anŏ ngă ding kơna sang bruă ngă hrŏm Công Bằng Thuận An, tơring glông Dak Mil, hơmâo ngă tui anăp pla kơphê rơgoh hơdjă, kơphê jơman phara. Gơnam kơphê tơpung mơ̆ng sang bruă ngă hrŏm anai, dưi hơmâo Jơnum min mơnuih ƀôn sang tơring čar Dak Nông pơsit brơi anăn OCOP 4 asar pơtŭ. Kơphê Thuận An sĭ mơdrô arăng blơi djơ̆ lăp hơnơ̆ng pơkă hiam, djơ̆ tui dêh čar Japan hăng hơdôm dêh čar kual Mi kô̆ kiăng blơi. Ayong Nguyễn Quốc Vương, khua wai lăng mơ̆ng sang bruă ngă hrŏm anai brơi thâo:

“Anom bruă ngă hrŏm đing nao biă mă kơ kơphê hiam amăng kual pơkă tui hră pơsit OCOP, dưi hơmâo anŏ pơsit anih pla ƀu phă pơrai lŏn glai ôh. Mơ̆ng bruă pơtô brơi ngă, wai lăng pla truh pơ djop bruă pĕ pơhrui anom ngă hrŏm hơmâo hrăm hơdră či mă bruă laih anun pơtô brơi kơ djop sang anŏ ngă ding kơna, anun yơh kual pla kơphê ngă tui djơ̆ lăp, klă soh. Lơ̆m pĕ pơhrui lĕ đing nao kơphê tơsă abih, rơnoh tơsă lu kah pĕ”.

Amăng kual pla kơphê lu tơring čar Dak Nông, mơ̆ng sa čô mơnuih ngă hmua kah hăng yă Trương Thị Thanh Lam, dŏ ƀơi plơi Kẻ Đọng, să Đức Minh, tơring glông Dak Mil ăt tŭ yua mơ̆n amăng bruă čih anăn kơphê hna mă kơ-uă jing tơpung mơ̆ng sang anŏ ñu ngă pô. Mut hrŏm akŏ pơjing rim boh să hơmâo sa mơta gơnam sĭ mơdrô hơmâo anăn sit nik, ngă gru hlâo, dưm amăng hruh kơdung, čih pơthâo anih pla pơjing, ming pơkra tong ten. Kơphê kơ-uă jing tơpung, kơphê hna hăng apui djuh sang anŏ gơñu arăng pơsit gơnam djơ̆ tơhnal pơkă OCOP mơ̆ng 3 asar pơtŭ truh 4 asar pơtŭ.

“Lơ̆m ta dưi hơmâo hră pơsit 3 asar pơtŭ hăng 4 asar pơtŭ lĕ kơnuih hmư̆ hing prong laih samơ̆ ƀu djơ̆ dưi ngă dơ̆ anun lĕ pơdơi yơh. 6 boh sang anŏ pla kơphê brơi sang anŏ gơmơi lĕ khom lăi pơthâo mơnuih ngă hmua khom tơguan kơphê tơsă abih kah pĕ, ñu mơ̆ng hiam, tŭ yua. Bơhmutu rơnoh arăng blơi amăng anih sĭ mơdrô ră anai 23.000 sa kg kơphê asăt, gơmơi blơi yom hloh 8000 prăk laih sa kg".

Ră anai, lu mơnuih ngă hmua amăng tơring glông Dak Mil, tơring čar Dak Nông hơmâo akŏ pơjing lu ruăi ngă hrŏm  pơkra ming, akŏ pơjing anăn păn gơnam sĭ mơdrô hăng pơđĭ tui rơnoh sĭ mơdrô sit mut hrŏm khul ngă hrŏm anăn gơnam sĭ mơdrô. Ayong Phan Gia Long, dŏ ƀơi să Đức Minh, khin hơtai pơphun bruă mă hăng tơlơi pơčeh phrâo pơkra mơ̆ng gơnam boh pơtơi mơtah. Tơpung boh pơtơi mơtah ñu pơkra rai dơlôn hĭ wil đơ asar ia jrao, lŭk hăng ia hni, hơdŏm mriă, miến krô mơ̆ng pơtơi mơtah.....ba sĭ mơdrô ƀơƀrư̆ arăng thâo krăn hăng rơkâo blơi laih anun phrâo hơmâo hră pơsit gơnam OCOP 3 asar pơtŭ. Ayong Phan Gia Long brơi thâo:

“Pơƀut lu mơta tơlơi pơkă puang OCOP djơ̆ găl tui tơlơi pơkă djơ̆ hơnơ̆ng anun kah mơ̆ng pơsit jơlan hơdră ƀing gơmơi či ngă, hơdră gơmơi pơgiong abih bruă jao djơ̆ lăp.Anun lĕ anih pơphun bruă pơčrong sai djơ̆ hăng mơnuih mă bruă sit nik khut khăt. Jai ngă brơi ƀuh, ta nao jơlan djơ̆ hăng anih pơčrong sai kơ bruă ruah gơnam OCOP anai tŭ yua klă biă mă”.

Ơi Nguyễn Văn Tuấn, Khua anom bruă ngă hmua hăng pơđĭ kyar plơi pla tơring glông Dak Mil, tơring čar Dak Nông brơi thâo, tơdơi kơ 6 thun pok pơhai hơdră rim boh să khom hơmâo sa mơta anăn gơnam sĭ mơdrô djơ̆ tơhnal pơkă truh ră anai, tơring glông hơmâo 19 mơta gơnam OCOP 4 asar pơtŭ hăng 3 asar pơtŭ. Hơdôm mơta gơnam sĭ mơdrô anun hơmâo pôr pơthâo anăn păn hăng pơđĭ tui rơnoh pơhrui glăi kơ mơnuih ƀôn sang, laih dơ̆ng djru pơsir bruă mă ƀơi tơring čar.

“Amăng bruă ngă tui lĕ mơnuih ƀôn sang pơphun hmar tŭ yua hăng hơduah ĕp, tơña bla, hrăm tui, ăt kah hăng ngă hrŏm ba pơdă gơnam sĭ mơdrô amăng mông pơdă gơnam sĭ mơdrô, lir hơbit hăng lu anom bruă pơkŏn laih anun pơdah thâo amăng plang internet, tơlơi pơhing mơnuih mơnam pioh pơđĭtui, pôr pơthâo rup rap, anăn gơnam sĭ mơdrô mơ̆ng boh troh đang hmua ƀơi Dak Mil...”.

Hơdră rim boh să hơmâo sa mơta gơnam sĭ mơdrô djơ̆ hơnơ̆ng sit nik ƀơi tơring glông Dak Mil, tơring čar Dak Nông hơmâo brơi ƀuh, boh tŭ yua rơđah rođong hăng pơđĭ tui pran kơtang, rơnoh bơwih ƀong huă sĭ mơdrô amăng kual plơi pla. Djă pioh hăng pơđĭ kơtang anŏ gêh găl mơ̆ng plơi pla, tơring glông, pơjing ruăi lir hơbit sĭ mơdrô gơnam pơkra djơ̆ hơnơ̆ng hiam, tŭ yua klă, čih anăn hmư̆ hing, ba gơnam đang hmua Dak Mil lăi pha, tơring čar Dak Nông hnun mơ̆n hlăk pơblih tui đĭ nao pơ anăp ba hyu truh pơ ataih hloh găn nao pơ ia rơsĭ prong tơbung tơbang.