Ayong Nguyễn Thế Tuấn ƀơi plơi prong Buôn Ma Thuột, tơring čar Dak Lak hmâo laih rơbêh kơ 10 thun mă bruă čơkă tuai čuă ngui mơ̆ng Dak Lak nao pơ̆ hơdôm bôh tơring čar kual Tŏng krah dêh čar kah hăng Đà Nẵng, Phú Yên, Khánh Hòa, Bình Định... Ayong Tuấn lăi pơthâo, mơ̆ng Buôn Ma Thuột nao Phú Yên găn Jơlan mrô 29, hmâo ha tal nao rai tañ hloh, yua kơ jơlan anai khă anet samơ̆ ƀu hmâo jơlan čun čue, dơnung kơdư. Bơ̆ ră anai, jơlan răm tui laih, jơlan nao rai kơplah wah Dak Lak hăng Phú Yên tơdơi kơ pơmut hrŏm, amra jing tơlơi ƀu anet ôh.

"Hlâo adih, nao mơ̆ng Buôn Ma Thuột truh pơ̆ Phú Yên kơnong kơ rơngiă 3,5 mông, ră anai rơngiă 5 mông kah mơ̆ng truh. Yua kơ jơlan răm rai, kiăng nao rai tañ ƀu dưi mơn. Pơmut hrŏm pioh pơđĭ kyar mơ̆ jơlan nao rai tui anun tơnap biă. Tơdah kiăng nao rai hruaih, pơđĭ kyar tơdơi kơ pơmut hrŏm lĕ khom pơkra glăi, pok prong jơlan nao rai”.

Yă Nguyễn Thị Thanh Thu lĕ sa amăng năng ai ñu 1.000 čô mơnuih apăn bruă, mơnuih mă bruă čar glăk mă bruă ƀơi tơring čar Phú Yên amra nao pơ̆ plơi prong Buôn Ma Thuột mă bruă tơdơi kơ pơmut hrŏm. Yă Thu brơi thâo, amăng tal nao Dak Lak jơnum črông sai bruă pơmut hrŏm, grŭp khom đuăi rơdêh kaih yua kơ jơlan añep, răm rai lu, khom bĕ lu rơdêh pơgiăng tơbâo, rơdêh pơgiăng gơnam tam hăng wot rơdêh dang wang mơ̆ng čơđai sang hră rô nao rai:

“Hmâo lu črăn jơlan sat, glăi truh pơ̆ sang ruă hrom hrah amăng drơi jăn ha hrơi. Pơ̆ anăp anai dua bôh tơring čar pơmut hrŏm sit nik pơphun, mơnuih apăn bruă Phú Yên nao pơ̆ Dak Lak mă bruă amra tơnap kơ bruă nao rai. Rim rơwang hrơi tơjuh kơnong kơ dưi glăi sang sa wot, lơm nao mơguah hrơi sa hăng čơtlăm hrơi 5 glăi. Samơ̆ jơlan nao rai tui anai sit ñu khom nao mơ̆ng čơtlăm hrơi 7 pioh mơguah hrơi sa mơ̆ng hmao mông mă bruă”.

Jơlan mrô 29 lĕ sa amăng hơdôm glông jơlan yôm phăn tô nao rai kual kơtuai hang ia rơsĭ Dơnung Tŏng Krah hăng Dap Kơdư; rôk nao truh guai dêh čar Dak Lak – Kur hăng abih bang rơwang ataih 293 km. Khă hnun hai, hăng tơhnal pơkă jơlan gưl IV kual čư̆ siăng, 2 glông jơlan rơdêh đuăi, atur prong 5,4 met hăng 7,5 met, atur jơlan pơkra mơ̆ng lu thun hlâo adih, Jơlan mrô 29 hmâo sit nik tơnap pioh pơđĭ kyar.

Ơi Trương Công Thái, Kơ-iăng Khua Jơnum min mơnuih ƀôn sang tơring čar Dak Lak, brơi thâo, jơlan gah glăk dưi ba tơbiă lĕ tuh pơplai pơkra glăi, pok prong hơdôm črăn jơlan mơ̆ng Km31+300 (găn nao rai Jơlan mrô 1, plơi prong Đông Hòa, tơring čar Phú Yên) nao pơ̆ anih găn nao rai Jơlan mrô 14 (Km178+062, plơi prong Buôn Hồ, tơring čar Dak Lak), hăng abih bang rơwang ataih năng ai ñu 147km. Jơlan pơkă hlâo pơkra glăi tui rơnoh pơkă gưl III, hăng rơnoh dăp hơdră 60-80km sa mông, hmâo 4 glông jơlan rơdêh đuăi, atur jơlan prong 20,5 m, rơnoh tuh pơplai rơbêh kơ 10.000 klai prăk.

“Ƀơi anăp khom pơkra glăi, pơplih pơkra pioh kơ bruă nao rai gêh gal amăng tơlơi mơnuih apăn bruă, mơnuih mă bruă čar nao mă bruă pơkă hlâo pơphun mơ̆ng lơ 1/9 pơ̆ anăp. Dua bôh tơring čar Phú Yên, Dak Lak hmâo ngă laih hră pơ-ar mơ-ĭt kơ Ding jum man pơdŏng, Prăk kak kơsem min pơpha prăk mă yua djru tơring čar pioh pơkra glăi, pơplih pơkra glông jơlan anai amăng hơdôm hrơi tañ hloh”.

Ơi Tạ Anh Tuấn – Khua Jơnum min mơnuih ƀôn sang tơring čar Phú Yên lăi lĕ, lơm Jơlan mrô 29 dưi pơplih pơkra, pơkra glăi, amra gal brơi kơ abih bang djop mơnuih hăng rơdêh đuăi nao rai, dŭ pơgiăng sĭ mơdrô, djru pơtrut pơđĭ kyar bơwih ƀong – mơnuih mơnam tơdơi kơ pơmut hrŏm. Khă hnun hai, gah sui thun, tơring čar Dak Lak phrâo sit ñu khom pơkra jơlan đuăi hmar tui dlông jơlan Ngŏ – Yŭ anăp nao gah ia rơsĭ, pơđĭ kyar tui tơlơi gah pơsit mơ̆ng Ping gah dêh čar. Tơlơi anai ăt dưi hmâo Ping gah dua bôh tơring čar tŭ ư hrŏm hăng amra pok pơhai tuh pơplai tui hơdră gum hrŏm bruă (PPP) amăng rơwang 2025-2030 pơ ala kơ tui tơlơi pơkă mơ̆ng Gong gai dêh čar rơwang tơdơi 2030. Ơi Tạ Anh Tuấn lăi tơlơi pơmin mơ̆ng pô.

“Hăng tơlơi kiăng ră anai phrâo hmâo lơm pơmut hrŏm dua bôh tơring čar, ăt kah hăng jơlan gah pơsit pơđĭ kyar anăp nao gah ia rơsĭ lĕ, bruă pơkra jơlan đuăi hmar ăt kiăng mơn. Dua bôh tơring čar Phú Yên hăng Dak Lak ƀudah tơdơi anai tơring čar phrâo Dak Lak amra lăi pơthâo glăi, lăi pơthâo kơ Gong gai, Khua pơ ala mơnuih ƀôn sang pơtrut tañ bruă ngă tui pơdŏng mơtăm amăng rơwang 2025-2030”.

Pơkra glăi Jơlan mrô 29 hăng pơkra jơlan đuăi hmar tô “glai hăng ia rơsĭ” pơjing jơlan phun kơ tơring čar Dak Lak phrâo, ƀu kơnong kơ tơlơi kiăng ječ ôh mơ̆, ñu dô̆ jing pran pơtrut jơlan pơđĭ kyar tơdơi kơ pơmut hrŏm. Sa jơlan nao rai phrâo, ha amăng plĕ amra pok prong pơlir nao rai kual, pơtrut bơwih ƀong – mơnuih mơnam pơđĭ kyar kơjăp hloh kơ tơring čar Dak Lak phrâo tơdơi kơ pơmut hrŏm ăt kah hăng kual Dơnung Tŏng Krah dêh čar – Dap Kơdư./.