VOV4.Jarai - Hrơi anai lơ 19/5, amăng dêh čar ta pơphun lu bruă ngă lơphet 132 thun hrơi tơkeng Khua mir sir Hồ Chí Minh. Hlâo kơ anun, amăng rơwang hrơi tơjuh rơgao, ƀơi Hà Nội hơmâo pơphun jơnum boh thâo gưl dêh čar, pơdă prưng rup hăng hơdrôm hră “Pơđĭ tui tơlơi pơmin ngă hơkrŭ, sut lui abih tơlơi pơmin kiăng klă mă hơjăn tui tơlơi pơmin, pran jua Hồ Chí Minh”. Ơi Võ Văn Thưởng, Ding kơna Ding jum kơđi čar, Khua apăn bruă Ping gah nao pơhmư̆ hăng git gai mông Jơnum. Mơng anun gum ngă rơđah anŏ yôm boh thâo - hơdôm bruă ngă tui mơng tơlơi pơmin Hồ Chí Minh kơ pơđĭ tui pran jua hơkrŭ lŏn ia, sut lui abih tơlơi pơmin kiăng klă mă hơjăn.

Lơ̆m dŏ hơdip, Khua mir sir Hồ Chí Minh, pô akŏ pơjing hăng pơđĭ kyar Ping gah ta, lêng lăng ba prong biă hăng bruă akŏ pơjing, pơđĭ kyar Ping gah, kiăng Ping gah ta mă bruă klă, hiam, kơjăp, sit jing sa Ping gah hơkrŭ lŏn ia mă bruă tơpă, hơmâo tơlơi pơmin. Amăng hrơi ngă lơphet hơdor 39 thun hrơi akŏ pơdong (3/2/1969), Ñu čih hră: “Pơđĭ tui tơlơi pơmin ngă hơkrŭ, sut lui abih tơlơi pơmin kiăng klă mă hơjăn”, pơsit tơlơi gơgrong bruă mơng Ping gah hăng bruă hơkrŭ Việt Nam laih anun anŏ kiăng yôm khŏm pơđĭ tui tơlơi pơmin pran jua hơkrŭ lŏn ia hăng khua mua, ping gah lăi hrŏm, rơnuk hlăk ai lăi hơjăn. Laih dong, črâo brơi hơdôm tơlơi ƀu klă mơng tơlơi pơmin kiăng klă mă hơjăn pô...Rơbêh ha mơkrah rơnuk thun tơdơi kơ čih, truh ră anai tơlơi čih anai ăt dŏ hơnong anŏ yôm hăng bruă pơđĭ kyar Ping gah, pơplih klă tui ping gah, hăng rim čô khua, mơnuih ping gah. Tơlơi čih jing tơlơi pơtă pơtăn yôm pơphăn mơ̆ Ñu pioh glăi kơ rơnuk ngă khua, mơnuih ping gah khŏm pơbuă tui, kơjăp bruă tui, gir pơgang pơgăn, lŏm lui tơlơi pơmin ngă mă hơjăn đah mơng pơđĭ tui tơlơi pơmin ngă hơkrŭ.

Tui hăng Nai prin tha, nai tha prin Hoàng Chí Bảo, mơnuih apăn bruă Sang hră Kơđi čar Dêh čar Hồ Chí Minh, amăng hơdrôm hră čih “Pơđĭ tui tơlơi pơmin ngă hơkrŭ, sut lui abih tơlơi pơmin kiăng klă mă hơjăn”, Wa pơƀut jăm ƀuah bruă ngă klă mă hơjăn pô đôč, Wa črâo rơđah: “ayăt amăng lăm - ayăt amăng pran jua ta hŭi hloh kơ ayăt roh sua lŏn ia” - Anai jing tơlơi pơhŭi hlâo kơ ƀing ta amăng bruă bơbuă, ngă kơjăp tui tơlơi pơmin pran jua lui kơ djai ba.

“Wa ñu jăm ƀuah wơ̆t hăng ƀing ngă djơ̆ aset bruă prong lĕ hyu ră ruai, pơ-ư pơ-ang hăng Ping gah, tơña kiăng Ping gah djru, apah hiư̆m pă wa? Wa ñu čih khut khăt mơtăm, hơmâo ƀing tui anun yơh mơng ngă ping gah ta kah hăng gai rơnan či yak đĭ ngă khua, ngă pơdrong. Ƀing hơmâo tơlơi pơmin pơhmao mă, bruă prong ƀu dưi ngă, bruă anet lĕ ƀu ngă ôh, hrăm hră lĕ alah, bruă mă lĕ ngă kaih, tuč rơnuč lĕ ngă soh tơlơi phiăn Ping gah hăng jing hơmâo tơlơi soh pơkơdong glăi Ping gah. hơdôm tơlơi lăi pơthâo pơtă pơtăn hlâo dlăm mơng rơbêh ha mơkrah rơnuk thun hlâo - jing tơlơi pơtă hlâo khŏp hăng ƀing ta amăng bruă bơrơguăt tui tơlơi pơmin hiam truh kơ djai ba”.

Anih jơnum boh thâo ia rơgơi dêh čar.

Čơkăp hrĕ pơphun pơdă prưng rup.

Hơdôm tơlơi ba bơkơtuai ƀơi mông jơnum hơmâo ngă rơđah tơlơi yôm mơng tơlơi pơmin pran jua Hồ Chí Minh amăng hơdôm mơta tơlơi pơmin hiam mơng Ñu kơ hơdôm bruă hơkrŭ Việt Nam; tơlơi gơgrong, phun mơng tơlơi pơmin pơčrâo brơi jơlan tơlơi pơmin Hồ Chí Minh hăng bruă akŏ pơjing Ping gah lăi hrŏm hăng bruă akŏ pơjing Ping gah kơ tơlơi pơmin pran jua hiam lăi hơjăn mơng hlâo truh ră anai hăng truh kơ rơnuk anai; tơlơi djơ̆ hrŏm kơplah wah tơlơi pơmin pran jua Hồ Chí Minh; tơlơi djơ̆, tơlơi gal pơsit brơi tơlơi djơ̆ hrŏm kơplah wah tơlơi klă hiam hơmâo mă hăng tơlơi pơmin hiam đah mơng djă pioh pran kơtang pơtrut pơđĭ kyar ƀrô pơgăn hĭ ƀing hơmâo tơlơi pơmin klă mă hơjăn.

Khua apăn bruă Ping gah Khul hơdôm anom bruă Ping gah Huỳnh Tấn Việt brơi thâo, Jơnum anai djru pơđĭ tui tơlơi thâo hluh, ngă dlăm tui hloh kơ tơlơi yôm mơng tơlơi pơmin, pran jua Hồ Chí Minh hăng bruă akŏ pơdong hăng pơplih hiam tui Ping gah. Laih dong, jing hrơi ta hơdor glăi hăng thâo hluh dlăm hloh hơdôm tơlơi pơtô lăi mơng Khua mir sir Hồ Chí Minh, laih anun kiăng ƀing khua ping gah lăng glăi pô gơñu, pơtrut tui hơdôm tơlơi klă, ƀư̆ pơkra tui hơdôm tơlơi aka ƀu djơ̆, hrưn đĭ djơ̆ hăng bruă jao bơwih brơi mơnuih ƀon sang kah hăng Khua mir sir Hồ Chí Minh pơtă pơtăn.

Ơi Huỳnh Tấn Việt lăi, tơlơi kiăng ngă amăng mông anai lĕ rim čô khua, mơnuih ping gah khŏm gơgrong bruă, ngă gru kiăng arăng hla tui; ƀing ngă khua prong, gơgrong bruă prong, biă ñu lĕ ƀing khua amăng Ping gah, gong gai jai kraih kiăng ngă bruă hiam, pơtŏp tui dong, kiăng hơdip hiam, hơmâo pran jua hiam, mă bruă djơ̆ tui anun kah mơnuih ƀon sang mơng hla tui:

“Thâo hluh tơlơi pơtô mơng Wa, ƀing ta khŏm gir hloh, ngă rơgoh amăng Ping gah, pơgăn hĭ hơdôm tơlơi pơmin soh sat, hơdip ƀu klă mơng ƀing khua, mơnuih ping gah, bruă ngă mă pô lui mă pô; ba bruă hrăm hăng hla tui tơlơi pơmin pran jua Hồ Chí Minh jing bruă hơmâo ngă na nao, jing tơlơi kiăng amăng gru grua ngă bruă mơng Ping gah”.

Pơhiăp git gai mông Jơnum, ơi Võ Văn Thưởng, Ding kơna Ding jum kơđi čar, khua apăn bruă git gai Ping gah pơsit: tơlơi yôm phun mơng bruă akŏ pơjing Ping gah kơ tơlơi pơmin hiam lĕ ngă tui tơlơi pơmin hơkrŭ, lăi nao hrŏm hăng ngă, kiăo tui dêh čar ngă bruă tơpă sit. Tơlơi pơmin klă mă pô jing “ayăt amăng pran jua” yua hnun kiăng “pơkơdong” khŏm pơphun mơng “akŏ pơdong”, amăng anun tơlơi pơsit lĕ hrăm, bơrơguăt, dưi bong glăi tơlơi hưp ham, anăm añ ƀơi anăp tơlơi arăng plư...Ơi Võ Văn Thưởng kiăng hơdôm anom bruă lăng yôm biă tơlơi pơkă, tơlơi phiăn amăng Ping gah, pơtrut tui bruă hyu hơduah ĕp, sem lăng, pơlir hăng pơplih hơdră git gai...; ngă bruă khŏm kiăng djơ̆ tơlơi phiăn, bơtơhmal kơtang hloh đah mơng kah đuăi ƀing ngă khua ƀu klă;  bơtơhmal khut khăt mơtăm ƀing ngă soh, pơhŭi hlâo kiăng bruă pơtô hla tui tơlơi pơmin ngă hơkrŭ, pơđĭ tui bruă lăng glăi tơlơi soh, ñim glăi tơlơi ƀu klă mơng pô.

VOV1: Čih - Siu H’Mai: Pơblang