VOV4.Jarai - Mơguah lơ 10/6, ƀơi plơi prong Buôn Ma Thuột, tơring čar Daklak pơphun ngă Lơphet kĭ pơkôl gum hrom pơdŏng bruă bơkơtuai pơplih phrâo pơčeh phrâo Dăp Kơdư. Anai lĕ sa amăng hơdôm tơlơi pơčeh phrâo mơng kơnuk kơna Australia amăng jơlan hơdră gum hrom kơplah wah Ding jum pơtom hiăp hăng sĭ mơdrô Australia, pơphun kơsem min bôh thâo hăng hơdră phrâo măi mok khul pơđĭ kyar hrom (CSIRO) hăng Ding jum kơsem min bôh thâo hăng hơdră phrâo măi mok Việt Nam.

Daklak, Daknông, Gialai, Kontum hăng Lâm Đồng hrom hăng CSIRO hmâo kĭ pơkôl tơlơi pơkôl gum hrom Bơkơtuai pơplih phrâo pơčeh phrâo kual Dăp Kơdư

5 bôh tơring čar Daklak, Daknông, Gialai, Kontum hăng Lâm Đồng hrom hăng CSIRO hmâo kĭ tơlơi pơkôl gum hrom Bơkơtuai pơplih phrâo pơčeh phrâo kual Dăp Kơdư. Bôh than mơng bruă bơkơtuai lĕ pơtrut pơplih phrâo pơčeh phrâo kiăng djru pơđĭ kyar kơjăp phik, dưm kơnar mơng gơnong bruă đang hmua hăng pơkra gơnam mă mơng đang hmua ƀơi kual. Amăng 3 thun, hơdôm bơnah amra pok prong hăng kơtưn tơlơi pơlir hrom gum hrom kiăng ngă gal brơi bruă tŭ mă tơlơi pơhing hăng bôh than pơplih phrâo pơčeh phrâo anô̆ dưi hmâo amăng hăng gah rơngiao kơ bruă  bơkơtuai; Pơtrut ngă brơi tơlơi pơmin phrâo, gum hrom tuh pơplai hăng pơdŏng hơdôm rơwang bruă gum hrom kơsem min kiăng kơtưn anô̆ gal bơkơtưn kơ hơdôm mơta gơnam sĭ kơ dêh čar tač rơngiao hăng pơkra gơnam mă mơng đang hmua amăng kual...

Siu H’ Prăk: Pơblang