Ƀơi Dak Lak, hlâo kơ bơyan hơjan ia ling dăo thun anai, 50 boh sang dŏ ƀơi kual dăo, plung dơnung ter hang ia krông Kỳ Lộ gah hơdôm să Tuy An Bắc hăng Đồng Xuân hơmâo djru pơdong brơi 50 boh sang akă yôl kơsu pông rơdêh huăi ia lip. Sa boh sang prong 20 met karê, gah gŭ krum dưm 16 boh kơsu pông rơdêh kiăng ia huăi lip; dua bơnah tơmeh tuh ƀêtông krăp bong kơjăp anăp bơtơpư̆ ia lip. Sit ia dăo, sang amra đĭ pơngŏ tui jơlah ia, djru mơnuih ƀôn sang ăt dŏ amăng sang hơđong.

Hlâo kơ anun, tơdơi kơ ia ling dăo kơtang răm ƀăm blan 11 thun hlâo, rơbêh 600 boh sang hơmâo pơdong ngă atur hăng dlông, man pơdong amăng tal ngă bruă djă anăn Quang Trung ngă hmar tañ giong, djru mơnuih ƀôn sang hơmâo anih dŏ hơđong bĕ ia ling dăo. Rơngiao kơ anun, prăk mơ̆ng ngă drap kơnuk kơna hăng mơnuih mơnam djru hrŏm, tơring čar Dak Lak hlăk pơtum pran jua mă bruă, gơnam yua pih man pơdong 100 boh sang bĕ ia ling dăo ƀơi plơi pla plung dơnung giăm hang ia krông. Sa boh sang bĕ ia ling dăo prong 220 met karê, sang ƀơi lŏn kơjăp, hơmâo gai pơsơi pơhlom grŏm tal, sang juă glai hăng sang apui, dưi djop brơi 200 čô mơnuih dŏ hrŏm amăng mông ječ ameč. Ră anai, hơdôm boh sang anai hlăk man đĭ ƀơi dlông tal 2 hăng ƀiă giong laih. Him lăng blan 9/2026, amra giong hăng mă yua. Tui anun yơh, bơyan hơjan hlim thun anai, bruă bĕ hĭ ia ling dăo mơ̆ng mơnuih ƀôn sang amăng kual ia juăt lip tơring čar Dak Lak amra thâo prăp lui hlâo yơh pơhlom pơgang. Ơi Đào Mỹ, Kơ-iăng Khua Jơnum min mơnuih ƀôn sang tơring čar Dak Lak lăi:

“Ƀing gơmơi kiăng Khul git gai, wai lăng djop sang bruă man pơdong, ngă hrŏm hơbit man tañ hloh, kiăng hơmâo anih dŏ tañ hloh klă hloh. Samơ̆ kŏn lơi yua kơ kiăng tañ đơi, ƀing ta ngă tŭ kơ hơmâo ƀu kơjăp. Ră anai, ƀing ta ăt hlăk pơhrua tong ten khul khua git gai bruă pơhlom hlâo amăng plơi pla mơnuih ƀôn sang, kiăng dưi bong glăi hăng tơlơi truh či hơmâo, djop pô khom thâo pơhlom mă pô amăng mông ječ ameč truh amăng plơi pla”.