VOV4.Jarai - Tơdơi kơ 3 hrơi mă bruă hăng tơlơi tơpă, mơguah lơ 11/3, Jơnum khua pơ ala Đah kơmơi đơ đam dêh čar ta tal 13 hmâo jơnum pơđut laih. Bruă jơnum hmâo pơsit pel ĕp Tơlơi pơtrun pơsit Jơnum 13 Khul pơplir hơbih Đah kơmơi Việt Nam hăng tơhnal pơkă: Ngă tui phiăn juăt, pran jua gum hrom hơbit, pơčeh phrâo, gơgrong hlâo mut hrom, thâo gơgrong pô mơng ƀing adơi amai; pơdŏng bruă Khul kơjăp kơtang, pơdŏng klă bruă Ping gah, pơdŏng glông bruă kơđi čar, pơgang tơlơi dưi pô hăng bôh tŭ yua lăp djơ̆ mơng đah kơmơi. Hrưn đĭ truh thun 2030, hơdor glăi 100 thun hrơi pơdŏng Khul pơlir hơbit đah kơmơi Việt Nam, pơsit pran gơgrong pơphun ba jơlan hlâo ngă bruă yua kơ tơlơi yâu mơ-ak mơng adơi amai, hmâo tơhnal bơdjơ̆ nao klă amăng kual hăng jar kơmar; djru ngă truh kih tơhnal pơđĭ kyar lŏn ia. Tơlơi pơtrun pơsit ăt hmâo ba tơbiă mơn tơhnal pơkă rim thun djru 33.500 bôh sang anô̆ hmâo đah kơmơi tơtlaih mơng ƀun rin, ƀun rin ƀơƀiă; djru pơđĭ tui bôh thâo brơi kơ 17.000 čô adơi amai lĕ pô anom bơwih ƀong, wai lăng Anom mă bruă hrom, pô sang bơwih ƀong sĭ mơdrô; truh rơnuč rơwang bruă, pơsur, djru hrom pơdŏng phrâo 350 bôh Anom mă bruă hrom hmâo đah kơmơi gum hrom wai lăng. Rim thun, rim anom Khul pơsur, djru dong 5 bôh sang anô̆ ngă djơ̆ tơhnal pơkă “sang anô̆ 5 ƀu hmâo, 3 agaih” ƀudah “sang anô̆ 5 hmâo, 3 hơdjă”...

Siu H’ Prăk: Pơblang