VOV4.Jarai - Tơdơi kơ sa hrơi ha mơkrah mă bruă ječ ameč, gơgrong, tơpă sit, lơ 12/7, Jơnum lok 13 Jơnum min apăn bruă Khua pơ ala mơnuih ƀon sang dêh čar tal XV pơđut hĭ. Đĭ pơhiăp amăng mông pơđut jơnum, Khua git gai pơ ala mơnuih ƀon sang dêh čar ơi Vương Đình Huệ pơsit tong, hơdôm boh tơhnal hơmâo sem lăng tong ten, ba glăi tơlơi tŭ ư hrŏm. Amăng jơnum tal anai, Jơnum min apăn bruă Khua pơ ala mơnuih ƀon sang dêh čar hơmâo sem lăng, pơsit ba tơbiă hơdră pơplih mă yua lŏn glai hăng lŏn ngă hmua pơdai mơng 2 bơyan pơ glông mơng Akŏ bruă man pơkra jơlan rơdêh  đuăi hmar Kơdư - Dơnung gah Ngŏ rơwang thun 2021-2025 hăng lu boh tơhnal yôm phun pơkŏn dong. Kơ bruă prap lui jơnum lok 4, Khua pơ ala mơnuih ƀon sang dêh čar tal XV, Khua čih pioh Khua pơ ala mơnuih ƀon sang dêh čar, Khua anom bruă Khua pơ ala mơnuih ƀon sang dêh čar Bùi Văn Cường brơi thâo, him lăng jơnum lok 4, Khua pơ ala mơnuih ƀon sang dêh čar tal XV amra pơphun amăng lơ 20/10/2022 hăng him lăng amra pơđut amăng lơ 18/11/2022.

Siu Đoan: Pơblang