Tui hăng jơlan hơdră ngă bruă mơguah anai, Khua mua pơ ala amra pơsit 2 tơlơi phiăn, anun lĕ: Tơlơi phiăn prăk pơhlôm nua mơnuih mơnam (pơkra glăi); Tơlơi phiăn wai lăng, mă yua phao kơtuang, mơnŏng ngă pơtuh hăng măi mok djru tui tlôn (pơkra glăi); Tơlơi phiăn čih pơkra glăi, pơhrua tui hơdôm tơlơi mơ̆ng Tơlơi phiăn lŏn tơnah, Tơlơi phiăn sang dŏ, Tơlơi phiăn sĭ mơdrô lŏn tơnah sang dŏ, Tơlơi phiăn hơdôm anom bruă brơi čan prăk. Khua mua ăt pơsit kơ boh than krăp lăng “Bruă ngă tui Tơlơi pơsit mơ̆ng Khua pơ ala mơnuih ƀôn sang  kơ bruă mă yua prăk kăk, djru Jơlan hơdră hơkrŭ glăi, pơđĭ kyar tơlơi bơwih ƀong huă - mơnuih mơnam hăng djŏp tơlơi pơtrun mơ̆ng Khua mua pơ ala mơnuih ƀôn sang kơ hơdôm kơčăo bruă yôm phun mơ̆ng lŏn ia ta truh abih thun 2023”; Tơlơi pơtrun kơ tơña hăng lăi glăi.

Rơngiao kơ anun lĕ Tơlơi pơtrun Jơnum lok 7, Khua pơ ala mơnuih ƀôn sang dêh čar tal 15 (amăng anun hơmâo lăi nao bruă pơplih tuh pơ alin Jơlan hơdră dêh čar pơđĭ kyar bơwih ƀong huă - mơnuih mơnam kụal mơnuih ƀôn sang djuai ƀiă hăng čư̆ siăng rơwang thun 2021-2030; hrŏ trun prăk jia; pơplih prăk blan; bruă pơhrơ̆i ƀiă hrơi tal hnưh hăng mrô prăk brơi čan ngă bruă wơ̆t hăng hơdôm tơlơi bơdjơ̆ nao bruă mă yua prăk pơđĭ tui prăk pơhrui glăi kơ kơnuk kơna thun 2023). Khua git gai pơ ala mơnuih ƀôn sang dêh čar ơi Trần Thanh Mẫn pơhiăp pơđut hĭ mông jơnum lok 7 anai.