VOV4.Jarai - Dlai Yok Đôn prong rơbêh kơ 115.000 ektar, dŏng ƀơi kual kơplah wah tơring čar Daklak hăng Daknông laih anun giăm hăng tơring čar Mundulkiri, dêh čar Kur. Ƀơi anai biă ñu lĕ dlai kyâu hla prong hlung amăng bơyan phang ƀudah dô̆ iâu lĕ “Dlai rưng” kyâu hui. Anai lĕ dlai lŏn ia ta dô̆ dưi pơgang djuai dlai klô pha ra anai. Kiăng pơgang pơhlôm hơdôm blah dlai kyâu hui amuñ apui ƀong amăng bơyan phang, Anom wai lăng dlai Yok Đôn dêh čar ta hăng hơdôm khul mơnuih plơi pla hmâo hăng glăk pok pơhai ha amăng plĕ lu jơlan gah pơhlôm hlâo hăng pơgang apui ƀong dlai.

Ayuh hyiăng ƀơi Dăp Kơdư glăk amăng ƀrư̆ truh hrơi blan pơ-iă phang kơtang. Gah rơgôp tơ-ui kyâu hrăi ƀơi Dlai Yok Đôn, rok tap ƀơi yŭ hăng lu tal hla kyâu hlung hăng dlông rok ale, rok hlang, amur pơ-ô... krô laih. Ơi Nguyễn Hữu Tạo – Kơ-iăng Khua wai lăng dlai kyâu Yok Đôn dêh čar ta lăi pơhing, amăng hơdôm hrơi anai rok hla kyâu amuñ apui ƀong. Dong mơng akô̆ bơyan phang mơtăm, anom bruă hmâo pok pơhai klă bruă pơgang pơgăn apui ƀong dlai. Hrom hăng bruă pơjing hơdôm met jơlan pơgăn apui ƀong, pơhrăm bruă pơgang pơgăn apui ƀong dlai, anom bruă hmâo guang dar, pơsir čuh lui hlâo rok khô tañ kiăng bĕ apui ƀong dlai.

“Amăng dlai ră anai hmâo 17 bôh anom gak wai, grŭp hăng ƀing gơmơi glăk črâo ba bruă dô̆ gak hrơi mlăm, pơhlôm pok pơhai truh abih bang hơdôm anih anom amăng dlai, ngă tui jơlan gah čuh rok krô wai lăng, pơsir gơnam apui ƀong. Ngă hiưm hơpă bruă čuh rok krô amăng kual anet, ƀu bơdjơ̆ nao phun kyâu, pơhlôm brơi kơ dlai bluh đĭ klă”.

Khul pơgang Dlai Yok Đôn guang dar kual, čuh rok krô

Amăng kual dlai rơhaih Yok Đôn ră anai hmâo giăm truh 30.000 bôh sang anô̆ dô̆ hơdip mơda, gah 7 bôh să mơng hơdôm bôh tơring glông Buôn Đôn, Ea Sup (Daklak) hăng tơring glông Čư̆ Jut (tơring čar Daknông). Abih bang neh wa lĕ djuai ania ƀiă, tơlơi hơdip mơda dô̆ hluai tui lu kơ dlai klô. Yă H’ Khưa Hđơt (djuai ania Êđê), ƀơi ƀôn Jang Lành, să Krông Na, tơring glông Buôn Đôn brơi thâo, sang anô̆ hrom hăng 19 bôh sang anô̆ pơpkon čơkă wai pơgang 500 ektar dlai klô gah dlai Yok Đôn. Amăng bơyan phang, neh wa hmâo pơpha jing 5 grŭp pơplih nao rai hyu tir pơgang dlai klô pơkĕ hrom hăng pok pơhai hơdôm bruă pơgang, pơgăn apui ƀong dlai.

“Mơng hơdôm hrơi mơnuih apăn bruă pơgang dlai klô jao kơ bruă wai lăng dlai klô, mơnuih ƀôn sang ăt kiăo tui tlôn gơñu mơn, ăt ngă klă, ƀu pioh apui ƀong dlai, hơdôm mơnuih čơkă mă dlai wai lăng, pơgang dlai ăt kiăo tui tlôn mơnuih mă bruă pơgang dli klô mơn, ƀu pioh hmâo tơlơi truh apui ƀong dlai. Mơng hrơi hơdôm mơnuih mă bruă wai lăng dlai klô rai hăng plơi pla lĕ pơtô brơi kơ mơnuih ƀôn sang amăng plơi pla dưi ngă đang hmua, kơsing mă lŏn dlai, mơng anun mơnuih ƀôn sang ăt thâo wai lăng hăng pơgang dlai mơn”.

Gum hrom pô dlai, hơdôm bôh sang anô̆ čơkă bruă jao pơkra rơbêh kơ 120 km jơlan pơgăn apui

Dlai Yok Đôn lĕ sa amăng hơdôm kual dlai klô gah kual dlai prong hloh đơ đam dêh čar ta hăng rơbêh kơ 115.000 ektar, dŏng ƀơi kual kơplah wah tơring čar Daklak hăng Daknông, giăm hăng tơring čar Mundulkiri, dêh čar Kur. Ƀơi anai hmâo rơbêh kơ 220 djuai rok tok kyâu pơtâo amăng anun hmâo lu djuai kyâu yôm; năng ai ñu 340 mơta djuai hlô, rơđah biă ñu lĕ rơman, gâu, hơkrŭ, rơmô dlai, ja por...

Ơi Phạm Tuấn Linh – Khua dlai Yok Đôn lăi pơthâo, tơlơi gum hrom ha amăng plĕ kơplah wah khul wai lăng dlai kyâu, gong gai plơi pla hăng hơdôm bôh sang anô̆ čơkă mă wai lăng hmâo ngă klă bruă pơgang dlai. Amăng lu thun jê̆ hăng anai, dlai Yok Đôn ƀu hmâo tơlơi apui ƀong prong hơpă ôh. Bơyan phang anai, Anom gum hrom hăng hơdôm bôh anom bơdjơ̆ nao pok pơhai khop hơdôm bruă pơgang apui ƀong dlai, jah agaih rơbêh kơ 120 km jơlan pơgăn apui ƀong, pơdŏng hơdôm rơtuh hnal lăi pơthâo, pơdŏng 17 grŭp ba jơlan hlâo ngă tui bruă lăng tui, dô̆ gak, lăi pơhing, pơsur mơnuih ƀôn sang gum hrom pơgang dlai.

“Kiăng pơgang dlai ƀudah pơgang pơgăn apui ƀong dlai ƀing gơmơi pơsit bruă pơgang hlôm hlâo yơh phun ñu. Anom hmâo pơphun lăi pơhing brơi rơbêh kơ 4.000 wot čô mơnuih ƀôn sang gum hrom hăng 5 bôh sang hră kiăng mơnuih ƀôn sang, čơđai sang hră thâo tơlơi yôm phăn mơng dlai klô. Gum hrom hăng Jơnum min mơnuih ƀôn sang 7 bôh să kual rơhaih pok pơhai tơlơi pơkă gum hrom pơphun hyu tir, pơgang, pơgăn pơsir hmao tlôn hơdôm bruă ngă bơdjơ̆ nao dlai klô. Hrom hăng anun lĕ rơkâo 17 bôh anom gak wai, grŭp ƀơi anun hyu tir klă, pơgăn hơdôm mơnuih ngă sôh ƀudah mơnuih ƀôn sang juăt mut amăng dlai djă ba apui amra ngă apui ƀong dlai prong”./.

Tuấn Long: Čih – Siu H’ Prăk: Pơblang