Tui hăng Jơnum min mơnuih ƀôn sang tơring čar Lâm Đồng, yua kơ adai hơjan hlim ia rô lu, jơlan čun čue čư̆ Prenn Đà Lạt juăt hơmâo lŏn tơhlŏm, kriăng dơlăm, kơčŏng čư̆ dlông tơpă dŏng mơtam anun amuñ biă hơmâo tơlơi truh lŏn tơhroh trun mơ̆ng čư̆ lê̆ ƀơi kriăng hăng pơhŭi kơ ƀing dŏ mă bruă čuk jơlan pok prong ƀơi čư̆ Prenn. Kơčăo bruă anai tui hăng akŏ bruă ngă giong, khom pơhlôm pơgang tơlơi rơnuk rơnua kơ ƀing dŏ mă bruă, Jơnum min mơnuih ƀôn sang tơring čar Lâm Đồng pơtrun hiăp kơ Khul khua mua wai lăng kơčăo bruă ƀơi tơring čar, ĕp lăng pơtrut mơnuih mă bruă hmar ƀiă hăng pơgang rơnuk rơnua amăng mông mă bruă.

Amăng anun, ngă tui djơ̆ tơlơi phiăn pơkă rơnuk rơnua mă bruă, dăp bruă djơ̆ găl hăng nao djru tañ hmao kru, hơmâo hơdră sem lăng ƀuh hlâo tơlơi či truh hăng pơgang khŏp. Hrŏm hăng anun, jơlan glông nao rai, apui lơtrik pơčrang bơngač jơlan, atur jơlan, jơlan weh amăng mông ječ ameč, rơnăk jơlan, ngă pơhiam treng jơlan lơ̆m dŏ mă bruă khom đing nao....kiăng hơmâo jơlan dưi rô nao rai rơhaih hloh trun nao pơ anih tuai čuă ngui Datanla hăng trun nao pơ akŏ čư̆ Prenn, giăm graih rơdêh pơgiăng tuai tơring čar, kiăng ngă giong hlâo kơ lơ 30/7/2023.