Tui hăng akŏ bruă mơng Ding jum bruă hmua hăng pơđĭ kyar ƀon lan, truh akŏ blan 3 pơ anăp, Kơčăo bruă pơkra dơnao kong ia 4,400 klai Krông Pač gah hlâo ƀơi Dak Lăk amra pơgăn glông ia rông, kŏng lui ia. Kơčăo bruă anai kiăng brơi ia pruih kơ năng ai 15.000 ha lŏn hmua ƀơi hơdôm boh tơring glông gah Ngŏ Dak Lăk. Khă hnun, truh mông anai, bruă brơi prăk, duh lŏn tơnah sang dŏ, čuk pơkra anih ngă bruă ăt aka ƀu giong ôh, dŏ hơmâo 488 boh sang anŏ dŏ gah lăm dơnao ia. Ră anai, Jơnum min mơnuih ƀon sang tơring glông M’Drăk, Dak lăk glăk ječ ameč pơphun ba đuăi mơnuih ƀon sang.

Bruă ba đuăi 488 boh sang anŏ hơmâo ngă tui tơlơi pơtrun mơng Jơnum min mơnuih ƀon sang tơring glông M’Drăk či pơkra dơnao kŏng ia Krông Pač gah hlâo - ring bruă tuh pơ plai 4.400 klai prăk ngă kaih amăng hơdôm thun yua dŏ hơmâo lu sang anŏ ƀu tŭ ôh hăng bruă brơi prăk, djru ba nao pơ anih dŏ phrâo. Anih dŏ phrâo aka ƀu giong hăng lŏn dŏ phrâo aka ƀu hơmâo djŏp yơh tơhnal phun ngă mơnuih ƀon sang ƀu tŭ. Bruă čuk lŏn tơnah, amăng mrô 742 boh sang anŏ amăng kual pơkra dơnao, truh mông anai, kơnong hơmâo 254 boh sang anŏ đôč nao dŏ pơ plơi phrâo. Abih bang sang anŏ hơmâo nao pơ anih dŏ phrâo mrô 2, să Čư̆ Bông, tơring glông Ea Kar.