VOV4.Jarai-Tal pơplông abih anih 12 gưl dêh čar hăng iâu pơmut hrăm sang hră gưl prong, hrăm bruă mă thun anai dưi pơphun amăng 2 hrơi, lơ 7 hăng lơ 8/7 ƀơi djop tơring čar, ƀôn prong amăng dêh čar. Phun kông ty apui lơtrik kual Tong krah hơmâo prăp lui laih hơdră pơkĕ apui lơtrik hơđong, rơnuk rơnua, na nao ƀu brơi tơ̆i đưn ôh ƀơi djop tơring čar, ƀôn prong kual Tong krah hăng Dap Kơdư. Phun kông ty Apui lơtrik kual Tong krah pơtrun hiăp kơ djop anom bruă apui lơtrik tơring čar, ƀôn prong ngă hrom khul khua mua, anih pơphun pơplông abih anih 12 gưl dêh čar kiăng thâo tong ten hnong yua apui lơtrik, pơkra hơdră hăng pơhlôm hơđong apui lơtrik bơwih brơi kơ tal pơplông.

Dưi thâo, amăng anih pơplông ƀơi 13 boh tơring čar, ƀôn prong Phun kông ty apui lơtrik kual Tong krah pơkĕ djop apui lơtrik kơ 422 boh anih pơplông. Hơdôm tơring čar hơmâo lu anih pơplông kah hăng Quảng Nam tơl 55 bit anih pơplông, Bình Định 43 bit hăng Gia Lai 40 bit anih pơplông. Ră anai Grup pơphun bruă mă hyu ĕp lăng, pơkĕ apui lơtrik yua, ming pơkra tơdah hơmâo anŏ răm, kiăng pơgang brơi hrơi pơplông rơnuk rơnua huăi tơ̆i đưn amăng mông pơplông…

Nay Jek: Pơblang