VOV4.Jarai-Rơwang hrơi tơjuh rơgao, ƀơi mông jơnum Khua mua git gai hơđong nua sĭ mơdrô mơ̆ng Kơnuk kơna, Kơ-iăng Khua dêh čar ơi Lê Minh Khái lăi pơtong: Djop ding jum, anom bruă, djop tơring čar amăng dêh čar lăng nao kơ tơlơi pơhing sit nik, pok pơhai lu hơdră pơgang hơđong rơnoh sĭ mơdrô amăng hrơi blan rŭ glăi tơlơi bơwih ƀong huă, pơhlôm hơđong tơlơi hơdip mơda mơnuih ƀôn sang, djru hrom bruă pơhlôm pơgang klin Covid 19; amăng anun lăi pơtong khom pơhlom djop ia săng ia jâo bơwih brơi bruă mă, sĭ mơdrô hăng bruă mă rĭm hrơi amăng tơlơi hơdip mơda.

Tui hăng pô čih tơlơi pơhing phrâo Gong phun jua pơhiăp Việt Nam ƀơi kual Tây Bắc Kơdư yŭ dêh čar ta, tơdơi kơ pơdơi ngă yang thun phrâo jing hrơi ƀong têt laih rơgao, ia săng ia jâo đĭ nua na nao ngă tơnap kơ mơnuih ƀôn sang hăng sang bruă sĭ mơdrô amăng kual. Ia săng đĭ nua yôm, pơmă ngă kơ mơnuih ƀôn sang bơngơ̆t biă mă. Ayong Nguyễn Trọng Thủy dŏ ƀơi phường Yên Ninh, plơi prong Yên Bái brơi thâo:

“Amăng mông tơnap tap djơh hăng anai, ia săng đĭ nua pơmă tui anun lĕ tơlơi hơdip mơda mơnuih ƀôn sang tơnap tap tui. Kơnong prăk ia săng đĭ rơdêh hyu đôč đač mơ̆ng kâo pô hai đĭ tui hơdôm rơtuh rơbâo prăk dơ̆ng  sa blan, aka ƀu yap ôh nua gơnam sĭ mơdrô či đĭ tui”.

Ƀing wai lăng anih anom sĭ mơdrô Kon Tum nao ĕp lăng anih sĭ mơdrô ia săng

Lu sang anŏ hơmâo rơdêh pơgiăng tuai ƀơi Yên Bái ăt lăi, aka ƀu hơmâo djơ̆ ôh tơnap tap kah hăng ră anai. Bơbeč djơ̆ mơ̆ng klin Covid 19 ngă kơ tơlơi hơdip mơda, bruă pơgiăng tuai tơnap tap, sang anŏ hơmâo rơdêh pơgiăng tuai lup na nao prăk apah pơgiăng tuai. Tơdơi kơ bơyan ƀong tết thun phrâo, laih pơwơ̆t glăi bruă mă kah hăng tơđar, djop sang bruă sĭ mơdrô pơgiăng tuai hyu ngui čang rơmang dưi pơhrua hơmâo ƀiă thơ, samơ̆ bưp hĭ ia săng đĭ nua dơ̆ng, ia jâo ăt hnun mơ̆n.

Pô čih tơlơi pơhing phrâo Gong phun jua pơhiăp Việt Nam dŏ ƀơi kual Dap Kơdư brơi thâo, ƀơi anăp kơ tơlơi pơhing ia săng, ia jâo đĭ nua anai, bruă kiăng blơi ia săng ia jâo bơwih brơi kơ tơlơi hơdip mơda lu biă mă, kah hăng ƀôp ia bruih kơ phun pla hmua pơdai amăng bơyan phang adai không, ƀing tơhan ngă bruă amăng kơnuk kơna ăt kiăng mă bruă hyu tir, rô nao rai lu, anun yơh kiăng biă mă ia săng ia jâo. Ơi Ngụy Đình Phúc, Khua grup wai lăng anih sĭ mơdrô mrô 2, Anom bruă wai lăng anih sĭ mơdrô tơring čar Kon Tum brơi thâo:

“Grup hyu ĕp lăng anih anom sĭ mơdrô gơmơi ăt pơtô lăi kơ djop sang bruă sĭ mơdrô ia săng, ia jâo thâo ngă tui djơ̆ jơlan hơdră tơlơi phiăn kơnuk kơna pơkă kơ bruă sĭ mơdrô. Ngă tui tơlơi pơtrun djơ̆ mông pok bah amăng, sĭ mơdrô djop. Tơdah pơdơi sĭ mơdrô khom lăi pơthâo hăng hră pơar kơ anom bruă kơnuk kơna pô wai lăng. Hyu ĕp mông sĭ mơdrô phrâo anai aka ƀu ƀuh lơi arăng ngă soh glăi kơ bruă sĭ mơdrô ia săng, ia jâo amăng anih sĭ mơdrô 3 boh tơring glông, ăt bơwih brơi djop anŏ kiăng mơ̆ng mơnuih ƀôn sang”.

Mông jơnum abih bang Khua mua git gai hơđong nua mŏng Kơnuk kơna

Anom bruă ia săng ia jâo Kon Tum, gah kông ty sa ding kơna sĭ ia săng ia jâo gak kơdư Kual Dap kơdư, sĭ mơdrô kơ anih rơhaih truh 60%. Ơi Võ Duy Tuấn, Khua anom bruă sĭ mơdrô ia săng, ia jâo Kon Tum brơi thâo, pơkă dưm dưm rĭm blan anom bruă anai sĭ mơdrô truh 6.500 met khô̆I ia săng, ia jâo. Kơnong kơ blan 1 rơgao rơnoh ia săng sĭ mơdrô truh 8000 m3. Tơlơi anai, brơi ƀuh anŏ kiăng ia săng ia jâo amăng bơyan phang  anai lu biă mă.

“Anom bruă gơmơi djă pioh na nao djop 80% rơnoh răk pioh ia săng, dưm dưm hăng1.860 m3. Gơmơi git gai djop sang sĭ mơdrô anet kơtưn ba nao ia săng pơhlôm djop kơ mơnuih ƀôn sang hăng anom bruă sĭ mơdrô. Khom ngă djơ̆ tơlơi pơkă mông pok bah amăng sĭ mơdrô tui hăng hră pơkôl hăng Gơnong bruă wai lăng sĭ mơdrô tơring čar. Nao ĕp lăng hŭi dŏ pơđôm lui amăng hơjai djă pioh ia săng laih anun ngă hră rơkâo ba pơmut ia săng mơtam hmao kru”.

Rơwang hrơi tơjuh rơgao, ƀơi mông jơnum Khul khua mua git gai mơ̆ng kơnuk kơna, Kơ-iăng Khua dêh čar ơi Lê Minh Khái lăi: Djop ding jum anom bruă, tơring čar, ƀôn prong lăng nao kơ tơlơi gêh găl sit nik, pok pơhai ngă tui hơdră pơhlôm pơgang hơđong nua ia săng, pioh pơtrut rŭ glăi tơlơi bơwih ƀong huă, pơgang klă tơlơi hơdip mơda mơnuih ƀôn sang, bơwih brơi kơ bruă pơgang klin Covid 19; amăng anun lăi pơtong nao kơ bruă khom djop ia săng bơwih brơi kơ bruă sĭ mơdrô hăng hơđong tơlơi hơdip mơda mơnuih ƀôn sang.

Pơblang tong ten kơ bruă sĭ mơdrô ia săng ia jâo, Kơ-iăng khua dêh čar lăi lĕ, anai lĕ gơnam yua kiăng biă mă, laih anun ñu bơbeč kơtang mơ̆n mơ̆ng anih anom sĭ mơdrô rŏng lŏn tơnah. Mơ̆ng lơ 11/1 truh lơ 21/2, nua lu mơta gơnam sĭ mơdrô ia săng ia jâo đĭ tui mơ̆ng 15-20% samơ̆ ia săng ia jâo mơtam kơnong đĭ mơ̆ng 9-14%. Tơlơi anai, kiăng lăi ta pơkă beč bal ƀiă, ngă hơđong nua ia săng ia jâo dơ̆ hnong dưi grong ba, rơgêh hloh hăng hơdôm dêh čar ieo gah.

Samơ̆, bruă ia săng amăng dêh čar rơgêh hloh lĕ, sit mơ̆n khom kơđiăng hŭi hơmâo tơlơi sĭ dŏp ia săng nao pơ dêh čar tač rơngiao. Yua kơ anun, djop sang bruă kơnuk kơna kiăng kơtưn hloh pơgăn bruă arăng sĭ mơdrô dop ia săng nao pơ dêh čar tač rơngiao. Kơ-iăng Khua dêh čar ơi Lê Minh Khái pơtrun hiăp kơ Ding jum wai lăng sĭ mơdrô pok pơhai bruă pơhlôm djop ia săng ia jâo kơ bruă sĭ mơdrô laih anun bơwih brơi tơlơi hơdip mơda kơ mơnuih ƀôn sang....Djop sang bruă kơnuk kơna kơtưn ĕp lăng, pơsir mơtam tơlơi soh glăi amăng bruă pơkă sĭ mơdrô:

"Kâo rơkâo tui hăng tơlơi pơkă mơ̆ng tơlơi phiăn kơnuk kơna lĕ pơ hơđong nua khom ngă tui djop mơta bruă Kơnuk kơna brơi ĕp lăng, krăo sŭ pioh git gai sĭ mơdrô tŭ yua hloh. Bơhmutu gơnam sĭ mơdrô hơgĕt ta kiăng pơhơđong nua khom ngă djơ̆ tơlơi pơtrun hơđong nua, pơđĭ trun nua tui hluai tơlơi gêh găl mơ̆ng tơlơi phiăn anai pơkă hơmâo 4 mơta hnong ngă hơđong nua, dua lĕ pơtong lăng nua, klâo lĕ pơčrông sai ngă hơđong nua laih anun pă lĕ khom ĕp lăng tơlơi pơhing arăng pơkă nua. Laih anun khom pơhaih rơđah tơlơi pơhing kơ nua sĭ mơdrô samơ̆ khom tơpă kơnang kơnang bruă ngă hrom plah wah djop ding jum anom bruă ngă hrom”.

Nay Jek: Pơblang