VOV4.Jarai - 15 hrơi rơgao ƀơi tơring glông Kon Plông, tơring čar Kontum hmâo hơdôm pluh tal lŏn pơpư̆ hăng tơtar hyu. Biă ñu čơtlăm lơ 23/8 hmâo lŏn pơpư̆ hmâo rơnoh 4.7, prong hloh amăng năng ai ñu 100 thun rơgao. Ƀơi anăp tơlơi tơnap him lăng mơng tơlơi lŏn pơpư̆ anai, tơlơi pơhlôm dơnao kŏng ia pơkĕ apui lơtrik, hnoh ia kiăng bŏng glăi hăng lŏn pơpư̆ ƀơi Kontum glăk dưi hmâo gong gai ăt kah hăng anom wai lăng đing nao.

Anom pơkă lăng ayuh hyiăng hăng lăng tui ia dưm ƀơi bơnư̆ dơnao ia kŏng pơkĕ apui gah Hlâo ia Kontum

Ơi Lê Đức Tín, Kơ-iăng Khua Jơnum min mơnuih ƀôn sang tơring glông Kon Plông, gong gai tơring glông hmâo kơtưn laih bruă wai lăng, lăng tui djơ̆ hloh hăng dua bôh dơnao kŏng ia pơkĕ apui prong, anun lĕ: Đăk Đrinh hăng rơnoh kŏng rơbêh kơ 248 klăk met khô̆i ia hăng dơnao kŏng ia pơkĕ apui gah hlâo Kontum hăng hơnong kŏng rơbêh kơ 145 klăk met khô̆i ia. Hrom hăng 3 bôh Anom pơkă lăng rơnoh lŏn pơpư̆ hmâo dưm truă, Sang bruă pơkĕ apui lơtrik gah hlâo Kontum gum hrom hăng Anom kơsem min vật lý rŏng lŏn dưm truă dong 3 bôh anom pơkă lăng kiăng lăi pơtă hlâo hmao tlôn hăng djru kơsem min dơlăm hloh kơ lŏn pơpư̆ amăng kual./.

Siu H’ Prăk: Pơblang