VOV4.Jarai -Anom bruă Khul git gai dêh čar kơ bruă pơgang ayuh hyiăng pơplih sat sat hơmâo hră pơ-ar ječ mơ-it Khul git gai pơgang ayuh hyiăng pơplih sat hăng djru brơi ană mơnuih bưp truh sat amăng tơring čar Lâm Đồng kiăng pơhlôm hlâo kơ hơjan hlim, ia ling dăo ƀơi ia krông Cam Ly. Tui tơlơi lăi pơthâo mơng Anom bruă wai lăng ayuh hyiăng rơhuông adai dêh čar, mơng lơ 20 truh lơ 23/5, ƀơi kual Dap kơdư hơmâo hơjan hlim hăng kruaih kơthel, djop anih hơmâo hơjan prong, đa anih kơtang biă mă. Kiăng gơgrong pok pơhai hơdôm hơdră pơhlôm hlâo hơjan hlim ia ling dăo juăt ƀuh ƀơi ia krông Cam Ly, Anom bruă Khul git gai dêh čar pơgang ayuh hyiăng rơkâo Khul git gai pơgang ayuh hyiăng hăng djru brơi mơnuih bưp tơlơi truth sat ƀơi tơring čar Lâm Đồng kiăo tui hơdôm tơlơi pơhing, pơhŭi hlâo mơng hơjan hlim, ia kor, lŏn tơhlŏm kiăng hmao tlôn tơl gưl gong gai, mơnuih ƀon sang, hơdôm anih anom tuai čuă ngui, biă mă ñu lĕ mơnuih mơng tač rơngiao, gơgrong amăng hơdôm hơdră pơgang lăp djơ̆, pơhlôm rơnuk rơnua brơi mơnuih ƀon sang, kông ngă hăng bơwih ƀong pla pơjing. Pok pơhai bruă pơgang ayuh hyiăng ƀơi anih anom pel ĕp hơdôm kual dơnung, kual amuñ lŏn tơhlŏm ter hang ia krông Cam Ly, găn nao hơdôm tơring glông Đức Trọng, Lâm Hà, Đà Lạt…kiăng gơgrong amăng bruă pơphun, ba đuăi mơnuih mơng kual ia ling dăo, pơđok ia, pơhlôm hŭi lŏn tơhlŏm.

Siu Đoan: Pơblang