VOV4.Jarai-Ding kơna ding jum kơđi čar, Kơ-iăng Khua dêh čar ơi Phạm Bình Minh hơmâo kĭ hră pơtrun mrô 724 mơ̆ng Khua dêh čar brơi pơgang tơlơi rơnuk rơnua hơđong jơlan glông nao rai amăng hơdôm hrơi mơak čơkă akŏ pơdong kơnuk kơna lŏn ia lơ 2/9. Amăng anun Khua dêh čar ta rơkâo, khom hơmâo hơdră pơhlôm pơgang bruă pơdŭ pơgiăng tuai rơnguai đĭ rơdêh ƀơi jơlan lŏn, jơlan ia rơsĭ hăng rơdêh por amăng hơdôm hrơi pơdơi mơak lơ 2/9 laih anun lu bruă rô nao rai mơ̆ng mơnuih ƀôn sang amăng dêh čar laih anun pơdŭ pơgiăng gơnam tam, boh nik ñu pơgiăng gơnam sĭ mơdrô, djop sang bruă wai lăng rơdêh đĭ, rơdêh pơgiăng khom rô nao rai rơnuk rơnua; ƀu lui hơmâo hơmâo tơlơi rô̆ nao rai, ngă kơniă jơlan, kơniă anih mut nao rai amăng graih rơdêh, graih rơdêh treng, tơdron rơdêh por, abih bang ngă tui khut khăt tơlơi phiăn pơgang rơnuk rơnua rô nao rai ƀơi jơlan glông;

Ƀu dưi pơgiăng tuai pơmut jêk kơniă amăng rơdêh đĭ, pơgiăng mơnuih lu rơgao mrô pơkă, tŭ tuai hăng ba tuai djơ̆ anih, truh pơ anih pơkă. Pơkra hơdră pơphun rô nao rai hluh gah, hluai, djơ̆ jơlan, djơ̆ arăt jơlan, amăng anih juăt hơmâo tơlơi truh rơdêh pơjrom, anih gun, kơđông rơdêh, jơlan phun mut nao rai pơ Hà Nội hăng ƀôn prong Hồ Chí Minh khom rơnuk rơnua soh.

Tơhan pơlih wai lăng jơlan glông kơtưn ngă bruă amăng lơ 2/9

Kiăng pơhlôm rơnuk rơnua jơlan glông nao rai amăng lơ 2/9, Jơnum min mơnuih ƀôn sang tơring čar Dak Lak git gai lu tơhan anom bruă kơnuk kơna: Hyu sem lăng jơlan glông, tơhan pơlih jơlan glông, tơhan pơgang tơlơi rơnuk rơnua…kơtưn bruă hyu tir, ĕp lăng, pơsir khut khăt tơlơi ngă soh glăi jơlan glông; pơtrut pơtô pơblang djop mơnuih ƀôn sang, biă mă ñu djop sang hră pơtô lăi, kiăng mơnuih ƀôn sang ngă tui djơ̆ tơlơi phiăn jơlan glông nao rai.

Laih dơ̆ng, pok pơhai mă yua mrô telephôn pioh iâu nao sit hơmâo tơlơi ječ ameč mơ̆ng tơhan pơlih jơlan glông, kông an tơring čar hăng mrô 0262.3692888; Gơnong bruă wai lăng jơlan glông hăng pơdŭ pơgiăng tơring čar Dak Lak mrô 0916.107447; 0983.436091 hăng Khul khua mua wai lăng tơlơi rơnuk rơnua jơlan glông tơring čar Dak Lak mrô 0914032256, pioh tŭ mă tơlơi pơhing, pơsir tơlơi pơhing lăi pơthâo nao tơlơi rơnuk rơnua, tơlơi rung răng truh ƀơi jơlan glông. Ơi Bùi Văn Ngọc Khua ƀirô Khul pơgang tơlơi rơnuk rơnua jơlan glông Dak Lak brơi thâo: mơ̆ng akŏ thun truh ră anai, tơlơi pơhing rơnuk rơnua jơlan glông ƀơi Dak Lak lêng kơ hrŏ truh tui 3 tơhnal pơkă, mrô tơlơi truh kơtang, mrô mơnuih djai hăng rơka rơkač. Rơđah biă mă ñu, rơbêh 8 blan rơgao amăng tơring čar Dak Lak hơmâo 151 wơ̆t rơdêh pơjrom kơtang, ngă djai 112 čô mơnuih, rơka rơkač 76 čô. Pơkă hăng tal anai thun hlâo hrŏ trun 9 wơ̆t, 11 čô mơnuih djai hăng 35 čô mơnuih rơka rơkač.

Tơlơi pơhing mơ̆ng kông ty pơčruh Graih rơdêh hà Nộ brơi thâo, kiăng bơwih  brơi mơnuih ƀôn sang rô nao rai mơak klă amăng lơ 2/9, Kông ty amra brơi nao 580 boh rơdêh djop mơta prăp lui bruă pơgiăng tuai hăng pơgiăng gơnam. Jao kơ anom bruă graih rơdêh sĭ wĕ djop jơlan nao rai laih anun git gai bruă rô nao rai khom rơnukronua hơđong, pơhlôm pơgang apui ƀong, tơlơi sat truh pơtuh, rơnăk anih dŏ ƀơi graih rơdêh. Laih dơ̆ng, ngă hrom anih anom pơčrâo git gai ƀing mơgăt rơdêh ƀuyt mơ̆ng Phun kông ty pơdŭ pơgiăng Hà Nội kiăng pơđĭ mrô rơdêh lu hloh pơgiăng tuai nao rai amăng ƀôn prong.

Tui hăng phun kông ty pơčruh ngăn Hà Nội, mrô tuai rô nao rai amăng hrơi pơdơi lơ 2/9 lu biă mă, amăng anun hơmâo lu anih lu hloh tơđar hrơi pơkŏn yap mơ̆ng tlam lơ 31/8 laih anun lơ 1/9; pơpha glông rơdêh pơgiăng tuai nao djơ̆ jơlan phun rơnuk rơnua truh lơ 4/9/2022.

Nay Jek: Pơblang