“Hơdor glăi 100 thun Hrơi hră pơhing hơkrŭ Việt Nam hăng lăi pơthâo nao rai kơ hơdră pơkă, hơdră bruă, ngăn drăp kơ bruă pôr pơhing, pơjing khul mơnuih mă bruă djơ̆ tui tơlơi kiăng pơđĭ kyar amăng rơwang phrâo” lĕ, anăn bơkơtuai yua kơ Gơnong bruă Bôh thâo, Bơkơjăp drơi jăn hăng Tuai čuă ngui Dak Lak, Khul čih tơlơi pơhing tơring čar, Grŭp pơtô bruă Ping gah hăng pơtô ba mơnuih ƀôn sang Ping gah tơring čar Dak Lak gum hrŏm pơphun čơtlăm lơ 17/6.

Amăng mông bơkơtuai, ƀing khua pơ ala lăi pơthâo kơ tơlơi lông ba tơbiă amăng rơwang phrâo, ba tơbiă hơdôm bruă pơsir kơ mơnuih mă bruă pôr pơhing djơ̆ tui tơlơi kiăng pơđĭ kyar. Tui hăng pô čih pơhing Đàm Thuần, Kơ-iăng Khua dăp hơdră hră pơhing phrâo Dak Lak, tơlơi kiăng jai hrơi jai dlông gah pơplih mrô hăng anô̆ kơjăp tơlơi pơhing, mơnuih čih tơlơi pơhing khom djă pioh kơjăp pran jua hơkrŭ, pran jua mă bruă. Hrŏm hăng anun, khom juăt bruă, thâo kơjăp anih anom pô gơgrong, khom jing mơnuih mă bruă mrô, pô pôr pơhing mrô. Khua pơ ala ăt pơlir hơbit mơ̆n, hăng anih anom phara ha jăn kah hăng Dak Lak, bruă pôr pơhing djơ̆, hmao tlôn, kiăng hloh truh hăng mơnuih ƀôn sang, biă ñu neh wa ƀơi kual asuek, ataih, kual djuai ania ƀiă, ƀu kơnong kơ bruă jao yôm phăn ôh mơ̆ ñu dô̆ jing bruă gơgrong kơđi čar, pran jua mơ̆ng mơnuih čih tơlơi pơhing dong./.