VOV4.Jarai-Tlam lơ 22/3, ƀơi plơi prong Hạ Long, tơring čar Quảng Ninh, Ding jum gru grua, Pơrơguăt drơi jăn hăng Tuai čuă ngui ngă hrom Jơnum min mơnuih ƀôn sang tơring čar Quảng Ninh, djop anom bruă pơdjơ̆ nao rơkâo pok glăi bruă mă tuai čuă ngui: Việt Nam-găn rơgao hlom bom. Ƀơi mông jơnum, ơi Nguyễn Trùng Khánh, Khua anom bruă wai lăng tuai čuă ngui, Ding jum gru grua, Pơrơguăt drơi jăn hăng Tuai čuă ngui hơmâo lăi pơthâo hơdră pok pơhai bruă mă čơkă tuai amăng dêh čar laih anun tuai čuă ngui jar kmar amăng mông pơwơ̆t glăi bruă mă kah hăng tơđar phrâo hăng hơdră pơgang klin rơnuk rơnua mơ̆n phun.

Jing anih tuai čuă ngui prong hloh amăng dêh čar, tơring čar Quảng Ninh ăt prăp lui čơkă tuai hăng pơphun lu tơlơi jơnum ngui ngor mơak gru grua, pơrơguăt drơi jăn, hyu ngui mơak sui hrơi amăng thun 2022. Kơnong amăng blan 4 thun anai, amra hơmâo lu tơlơi jơnum ngui mơak kah hăng: Jơnum Carnaval Hạ Long 2022, jơnum pơdah ao dai hiam, pơplông mơnong ƀong huă, pơplông ƀlư̆ myang Xiếc jar kmar hiam mơak…

Nay Jek: Pơblang