Hrom hăng khua mua hơdôm ding jum, gơnong bruă hăng 2 bôh tơring čar Dak Lak, Khánh Hòa, lu mơnuih ƀôn sang ƀơi kual asuek să Čư̆ Drăm, tơring glông Krông Bông hăng Čư̆ San, tơring čar Dak Lak ăt nao lăng mơn hrơi mông pơphun hmâo ring bruă pioh glăi gru grua anai. Ayong Trần Hữu Thới, ƀơi să Čư̆ Drăm, tơring glông Krông Bông, tơring čar Dak Lak, pơdah pran jua:

 “Kâo ƀuh klă biă. Ring bruă anai khom lăi lĕ jơlan phun. Tơlơi dong lĕ ngă giăm hloh bruă nao rai, hăng amra pơ̆ anăp anai pơđĭ kyar bơwih ƀong tañ biă”.

Rơwang bruă mă yua prăk pơkra jơlan đuăi hmar Khánh Hòa – Ƀuôn Ma Thuột hmâo anih tơkuh nao rai kơplah wah Jơlan mrô 26 hăng Jơlan mrô 1, kual Nam Vân Phong, plơi prong Ninh Hòa, tơring čar Khánh Hòa; anun rơnuč tơkuh nao rai hăng jơlan Hồ Chí Minh jơlan wer gah Ngŏ plơi prong Ƀuôn Ma Thuột, tơring čar Dak Lak. Abih bang ataih giăm truh 118 km, prăk mă yua rơbêh kơ 21.900 klai prăk. Amăng anun tơring čar Khánh Hòa ngă pô gơgrong pơkra 32 km, prăk mă yua 5.632 klai prăk; Ding jum wai lăng jơlan nao rai dŭ pơgiăng dêh čar ta ngă pô gơgrong pơkra 37,5 km, prăk mă yua 9.818 klai prăk, dô̆ glăi lĕ tơring čar Dak Lak ngă pô gơgrong. Thun blan pơkra jơlan anai pơkă hlâo mơ̆ng blan 6/2023 truh thun 2030 amra pơkra giong ha amăng plĕ hăng mă yua.

Ơi Phạm Ngọc Nghị, Khua Jơnum min mơnuih ƀôn sang tơring čar Dak Lak brơi thâo, tơring čar hmâo črâo ba mơng hrơi rơwang bruă dưi pơsit hăng pơphun pơsir anih anom pơkra jơlan, hăng pơsit pran bruă kơđi čar mơng tơring čar:

 “Gah bruă gơgrong mơng pô, tơring čar Dak Lak pơkôl hăng Khua dêh čar amra đing nao git gai Grŭp wai lăng rơwang bruă, hrŏm hăng hơdôm bôh ƀirô, anom bruă, tơring čar pơtrut tañ bruă pơsir anih anom man pơkra dô̆ glăi, jao abih bang anih anom hăng hơdôm tơlơi kiăng yua kơ anom man pơkra jơlan hlâo kơ lơ 31/12/2023; ngă gal brơi hloh pioh hơdôm anom pơphun man pơkra, lăi pơthâo ngă tui rơwang bruă djơ̆ tui rơnoh, anô̆ kơjăp”.

Lom pơkra giong, jơlan đuăi hmar Khánh Hòa – Ƀuôn Ma Thuột tal sa amra djru pơjing jơlan phun tô nao rai Dap Kơdư hăng kual ia rơsĭ Dơnung Tŏng Krah dêh čar, tô nao rai jơlan đuă hmar Kơdư – Dơnung gah Ngŏ, jơlan Hồ Chí Minh, Jơlan mrô 1, jơlan kơtuai hang ia rơsĭ, ngă tui ba glăi bôh tơhnal hơdôm rơwang bruă hmâo hăng glăk yua prăk man pơkra, djơ̆ hăng tơlơi kiăng dŭ pơgiăng, pơjing anih anom, pran pơtrut pơđĭ kyar. Ring bruă ăt djru pơđĭ tui mơn pran bơkơtưn, pơtrut pơlir hơbit, gum hrŏm hăng pơđĭ kyar kual, djru pơhlôm rơnuk rơnua plơi pla, lŏn ia, hrŏ trun rin rơpa, amăng ƀrư̆ ngă tui truh kih hơdôm tơhnal pơkă, bruă pơđĭ kyar bơwih ƀong – mơnuih mơnam tui Tơlơi pơtrun pơsit Jơnum tal 13 mơ̆ng Ping gah. Hăng mơnuih ƀôn sang ƀơi hơdôm anih anom kual asuek, ataih gah tơring čar Dak Lak hăng kual čư̆ siăng gah Yŭ tơring čar Khánh Hòa, rơwang bruă jơlan đuăi hmar Ƀuôn Ma Thuột – Khánh Hòa lĕ ring bruă djă pioh gru grua, jing tơlơi đing nao mơ̆ng Ping gah, Kơnuk kơna, hloh kơ tơlơi čang rơmang mơ̆ng neh wa.

Hrŏm hăng jơlan đuăi hmar Khánh Hòa - Ƀuôn Ma Thuột, tal anai dô̆ hmâo 2 rơwang bruă yôm phun pơkŏn ăt dưi man pơkra mơn, anun lĕ Jơlan đuăi hmar Biên Hòa – Vũng Tàu hăng Rơwang bruă Jơlan wer 3, ƀôn prong Hồ Chí Minh. Anai lĕ 3 Rơwang bruă yôm phăn jơlan nao rai dêh čar ta hăng abih bang rơwang ataih mơ̆ng 3 ară jơlan lĕ 247 km; abih bang prăk mă yua mơ̆ng 3 Rơwang bruă rơbêh kơ 115 rơbâo klai prăk.

Pơhiăp amăng mông ngă lơphet, pơ ala kơ Kơnuk kơna ta, Khua dêh čar ơi Phạm Minh Chính lăi rơđah, Jơnum Ping gah đơ đam dêh čar tal 13 hmâo pơsir dong pơdŏng pơkra anih anom mă yua ha amăng plĕ lĕ sa amăng 3 tơlơi pơplih phrâo, amăng anun đing nao pơđĭ kyar sa dua ring bruă phun pơkra jơlan nao rai dêh čar ta. Khua dêh čar ta črâo rơđah, tơlơi phara mơng 3 rơwang bruă:

 “Tơlơi phara mơng 3 rơwang bruă pơkra jơlan ră anai lĕ hơdôm rơwang bruă leng kơ dưi mă yua hơdră ha jăn hmâo kơ pơtrut kơtang bruă apăn bruă, kiăo tui anun jao kơ tơring čar ngă pô gơgrong ngă tui rơwang bruă; mă yua hơdră iâu pơhrui ngăn rơnoh kơ rơwang bruă pơkĕ hrŏm kơplah wah ngăn drăp Kơnuk kơna hăng tơring čar; mă yua tơlơi črâo pơsit pô gơgrong man pơkra pioh ruah pô gơgrong man pơkra rơwang bruă, mơ̆ng anun ngă ƀiă hrơi blan prăp lui pioh pok pơhai rơwang bruă. 3 hơdră pơkă anai leng kơ ngă tui đut hlah bôh tŭ yua, pơtŏng sit tơlơi djơ̆ mơ̆ng Ping gah, Kơnuk kơna amăng bruă mă yua hơdră pơkra phrâo pioh pơkra giong jơlan đuăi hmar ha amăng plĕ tui Tơlơi pơtrun pơsit  mơ̆ng Ping gah".

Bôh nik hmâo pơdah rơđah laih, jơlan nao rai dŭ pơgiăng lăi hrŏm hăng jơlan đuăi hmar, tơdrŏn rơdêh por, tơdrun tum păn lăi ha jăn ba glăi bôh tŭ yua rơđah rơđông bruă pơđĭ kyar bơwih ƀong – mơnuih mơnam. Jơlan nao rai pơđĭ kyar dơ̆ hơpă amra pok tơbiă anih anom pơđĭ kyar phrâo gah bơwih ƀong – mơnuih mơnam dơ̆ anun, lu kual plơi prong, kual sang măi, sĭ mơdrô, tuai čuă ngui dưi pơjing, lŏn dưi mă yua ba glăi bôh tơhnal./.