VOV4.Jarai-Jơnum khua ding jum Pơtô hăng Pơjuăt ASEAN tal 12 hơmâo pơphun ƀơi Hà Nội. Anai lĕ, bruă ngă amăng lu jơnum Khua ding jum, khua mua gah anom bruă pơtô hăng pơjuăt ASEAN yua kơ Khua ding jum Pơtô hăng pơjuăt Việt Nam pô git gai amăng rơwang thun ngă khua pơblih nao rai gah bruă pơtô pơjuăt ASEAN thun 2022 hăng 2023. Ƀơi mông jơnum, Khua ding jum pơtô pơjuăt ASEAN pơtum pơčrông sai tơlơi pơhing pơtô hrăm mơ̆ng rĭm boh dêh čar, kah pơpha nao rai tơlơi thâo thăi, găn rơgao hăng hơduah ĕp bruă ngă hrom, anăp nao kơ bruă pơtô hrăm hơđong kjăp mơ̆ng rĭm boh dêh čar, boh nik ñu tơdơi kơ klin Covid 19.

Jơnum anai ăt lăi pơthâo akŏ bruă pơtô pơjuăt kual ASEAN mơ̆ng thun 2021-2025 hăng pơčrông sai lu tơlơi pơkŏn amăng bruă mă. Giong jơnum khua mua ding jum pơtô hăng pơjuăt tal 12 ASEAN, Khua ding jum pơtô hăng pơjuăt Việt Nam, ơi Nguyễn Kim Sơn git gai jơnum khua ding jum pơtô hăng pơjuăt ASEAN+3 hăng dêh čar Hàn Quốc, Japan, Khač tal 6 hăng jơnum ASEAN-EAS hơmâo hơdôm dêh čar ASEAN +3 hăng hơdôm bơnah ngă hrom Mi, Australia, New Zealand, Nga, India tal 6.

Nay Jek: Pơblang