Amăng 3 hrơi mă bruă, Jơnum min apăn bruă phun pơ ala mơnuih ƀôn sang dêh čar amra pơgôp hiăp hăng sem lăng, pơsit lu boh yôm phun kơ dêh čar. Pơgôp hiăp bruă pơƀut, jŭ yap glăi hăng ngă tui Hră pơtrun mơ̆ng lu sang bruă pơlỉ hơbit mrô 525 mơ̆ng Jơnum min apăn bruă phun pơ ala mơnuih ƀôn sang dêh čar tal 13 kơ bruă bưp mơnuih ruah khua mơ̆ng ƀing pơ ala mơnuih ƀôn sang dêh čar.

Lăp đing nao, ƀơi mông jơnum tal anai, Jơnum min apăn bruă phun pơ ala mơnuih ƀôn sang dêh čar pơgôp hiăp kơ Tơlơi phiăn  jơlan lŏn hăng Tơlơi phiăn rơnuk rơnua rô nao rai ƀơi jơlan glông; Pơƀut bruă mă jơnum lok 5 hăng pơgôp hiăp kơ bruă prăp lui jơnum lok 6 mơ̆ng ƀing pơ ala mơnuih ƀôn sang dêh čar tal XV. Hrŏm hăng anun, Jơnum min apăn bruă phun pơ ala mơnuih ƀôn sang dêh čar semlăng, pơsit hĭ Hră pơtrun kơ bruă dăp glăi, pơpha anom bruă wai lăng gưl tơring glông, gưl să mơ̆ng thun 2023-2030. Pơdjơ̆ nao kơ bruă krăo lăng mơ̆ng ƀing pơ ala mơnuih ƀôn sang dêh čar, Jơnum min apăn bruă phun pơ ala mơnuih ƀôn sang dêh čar hmư̆ tơlơi pơgôp hiăp kơ boh tơhnal krăo lăng blung a kơ sa hnong bruă mơ̆ng jơnum min anai kơ pơblih phrâo hơdră pơtô, hơdrôm hră pơtô hrăm djop gưl ƀơi dêh čar.