VOV4.Jarai-Mơguah lơ 28/6, Khua mua apăn bruă ping gah ƀôn prong Hà Nội pok jơnum lok 8, sem glăi bruă mă, pơgôp hiăp kơ lu boh yôm phun, amăng anun hơdră pơđĭ kyar sang dŏ ƀơi ƀôn prong Hà Nội, mơ̆ng thun 2021-2030; kơčăo bruă čih pơkra Hơdră mă bruă mơ̆ng Ping gah ƀôn prong tui Hră pơtrun mrô 15 mơ̆ng Ding jum kơđi čar kơ anăp ngă bruă, bruă khom ngă pơđĭ kyar plơi prong jưh jom Hà Nội truh thun 2030, lăng nao pơ anăp adih truh thun 2045. Pơhiăp amăng mông jơnum, kơ Hơdră pơđĭ kyar sang dŏ ƀơi ƀôn prong Hà Nội mơ̆ng thun 2021-2030, Khua git gai ping gah ƀôn prong Hà Nội, ơi Đinh Tiến Dũng brơi thâo, Kơčăo bruă čih pơkra Hơdră hơmâo khua mua ping gah ƀôn prong čih pơgiong laih, tum teč tui tơlơi pơkă hnong.

Hră lăi pơthâo mơ̆ng khua mua apăn bruă ping gah Jơnum min mơnuih ƀôn sang ƀôn prong brơi ƀuh, 6 blan akŏ thun, ƀôn prong hơmâo pơgăn laih klin Covid 19; hơdôm bruă mă pơkra ming sĭ mơdrô, tuai čuă ngui, sĭ mơdrô mơnong ƀong huă, sang jưh tuai dưi pok glăi bah amăng, rŭ glăi bơwih ƀong huă. Prăk duh jia amăng ƀôn prong đĭ tui 20% pơkă hăng tal anai mơ̆n thun 2021 hăng giăm 57% rơnoh pơkă sa thun. Đĭ tui rơnoh gơnam tam pơhrui glăi amăng 6 blan truh 7,7%- lu hloh 1,29 wơ̆t pơkă hăng tal anai mơ̆n thun 2021.

Nay Jek: Pơblang