Him lăng amăng tal jơnum hăng mă bruă lok anai abih 29 hrơi mơkrah, ƀiă buă sa blan. Ƀơi tal jơnum anai, ƀing pơ ala mơnuih ƀôn sang dêh čar sem lăng, pơsit 15 mơta tơlơi phiăn dêh čar anun lĕ Tơlơi phiăn Luật Phòng cháy, chữa cháy tơlơi phiăn kơ bruă pơhlôm, pơčruih apui ƀong sang hăng tơlơi phiăn pơklaih mơnuih mơnam ječ ameč; Tơlơi phiăn čih pơhrua glăi Tơlơi phiăn Pơhlôm nua ia jrao; Tơlơi phiăn pơhlôm, pơgăn sĭ mơdrô mơnuih čih pơhrua glăi; Tơlơi phiăn Công đoàn, mơnuih tơpuôl……

Ƀing pơ ala mơnuih ƀôn sang dêh čar ăt amra sem glăi, pơgôp hiăp kơ 13 mơta tơlơi phiăn phrâo, lăp đing nao lĕ tơlơi phiăn bruă apui lơtrik, tơlơi phiăn Nai pơtô hrăm hră, tơlơi phiăn mă jia rơnoh prăk kơmlai sang bruă mơdrô, tơlơi phiăn čih pơhrua glăi amăng tơlơi phiăn Quảng Cáo, pôr pơhưč. Amăng mông jơnum lok 8 anai, ƀing pơ ala mơnuih ƀôn sang dêh čar pơtong glăi boh tơhnal ngă tui pơđĭ kyar bơwih ƀong huă mơnuih mơnam, bruă yua prăk kơnuk kơna thun 2024 hăng sem glăi, pơsit hơdôm akŏ bruă bơwih ƀong huă mơnuih mơnam, jŭ yap lăng rơnoh prăk či mă yua amăng kơnuk kơna, hơdră pơpha rơnoh prăk mơ̆ng dêh čar amăng thun 2025; sem glăi djop hră lăi pơthâo gah bruă mă tơlơi phiăn, pơhlôm, pơgăn ƀong kông ngăn, juăt ƀong prăk la, tơlơi soh glăi hăng tơlơi phiăn kơnuk kơna laih anun pơsir kơđi mơnuih ƀôn sang ruah khua rơkâo đĭ.