VOV4.Jarai - Mơguah lơ 28/3, ƀơi tơring čar Vĩnh Phúc, Khul hlăk ai rơnuk Hồ Chí Minh dêh čar ta pơphun ngă Lơphet pơphun anăp nao Thun pơhlôm ƀơi jơlan nao rai thun 2022. Hăng anăn ñu “Yua kơ tơlơi suaih pral, tơlơi hơdip mơng mơnuih nao rai ƀơi jơlan glông”, hơdôm gưl Khul, Grŭp, Tơpul đơ đam dêh čar ta amra pok pơhai ha amăng plĕ hơdôm bruă pơđĭ tui bôh thâo ƀơi jơlan nao rai, pơhlôm hơđong ƀơi jơlan nao rai pơ̆ hơdôm anih anom juăt hmâo tơlơi truh, gum hrom pơdŏng pơkra jơlan nao rai.

Ngă Lơphet pơphun Thun pơhlôm ƀơi jơlan nao rai.

Rơngiao kơ anun, Khul hlăk ai rơnuk Hồ Chí Minh dêh čar ta amra gum hrom hăng Jơnum min pơhlôm ƀơi jơlan nao rai dêh čar pok pơhai hơdôm jơlan hơdră prong kah hăng Hrơi jơnum “Hlăk ai hăng bôh thâo ƀơi jơlan nao rai”, Bơkơtuai “Hlăk ai hăng bôh thâo ƀơi jơlan nao rai”, Jơnum “Khua git gai hlăk ai hăng pơhlôm ƀơi jơlan nao rai”, Bruă pơplông “Mă yua bôh thâo măi mok amăng pơhlôm hơđong ƀơi jơlan nao rai”. Tơdơi kơ mông ngă Lơphet, năng ai ñu 1 rơbâo mơnuih amăng khul hlăk ai, tơdăm dra tơring čar Vĩnh Phúc hmâo rơbat trui, lăi pơhing kơ pơhlôm ƀơi jơlan nao rai; gum hrom bơkơtuai “Tơpai ƀiêr hăng tơlơi truh ƀơi jơlan nao rai”./.

Siu H’ Prăk: Pơblang