VOV4.Jarai - Mơguah kơ 28/3, ƀơi Sang mă bruă Khua pơ ala mơnuih ƀôn sang dêh čar ta, pơphun Jơnum Khua pơ ala mơnuih ƀôn sang gơgrong bruă bơkơtuai kơ sa dua mơta rơwang bruă tơlơi phiăn lăi pơthâo kơ khua pơ ala mơnuih ƀôn sang amăng tal jơnum lok 3, Khua pơ ala mơnuih ƀôn sang dêh čar ta tal 15. Bruă jơnum bơkơtuai, gum pơhiăp kơ 4 rơwang bruă: Tơlơi phiăn pơplih pơkra, pơhrua nao sa dua mơta tơlơi mơng tơlơi Phiăn tŭ yua bôh thâo pô; Tơlơi phiăn bơkơtưn, apah bơni (pơplih pơkra); Tơlơi phiăn ngă phim (pơplih pơkra) hăng Tơlơi phiăn bơwih ƀong sĭ mơdrô hmâo hră pơgang ba (pơplih pơkra).

Pok phun Jơnum Khua pơ ala mơnuih ƀôn sang gơgrong bruă

Khua git gai wai lăng pơ ala mơnuih ƀôn sang dêh čar ta ơi Vương Đình Huệ brơi thâo, hăng pran jua prăp lui tŏng ten, mơng tañ, mơng ataih, tơdơi kơ pơđut Tal jơnum lok 2 mơtăm, Jơnum min apăn bruă Khua pơ ala mơnuih ƀôn sang dêh čar ta hmâo črâo ba hơdôm bôh ƀirô ruah mă tañ, tơpă hăng pơblang, tŭ mă tơlơi gum pơhiăp mơng ƀing khua pơ ala mơnuih ƀôn sang. Bruă prăp lui tŏng ten hơdôm rơwang bruă tơlơi phiăn hlâo kơ lăi pơthâo kơ Khua pơ ala mơnuih ƀôn sang lăng glăi, kiăng pơhlôm anô̆ kơjăp prong hloh kơ hơdôm rơwang bruă Tơlơi phiăn, hrom hăng anun amra dưi pơkrem đut hlah hrơi blan jơnum sit nik mơng hơdôm tal jơnum Khua pơ ala mơnuih ƀôn sang.

Siu H’ Prăk: Pơblang