VOV4.Jarai - Mơguah lơ 26/5, Jơnum pơgi kơdih anai tal 27 hmâo pok phun ƀơi plơi prong jưh jom Tokyo, dêh čar Japan hăng tơlơi nao pơhmư̆ mơng lu khua mua kual ASIA kah hăng Khua dêh čar Singapore ơi Lý Hiển Long, Khua dêh čar Thái Lan ơi Prayut Chan-o-cha. Kơ-iăng Khua dêh čar ta, ơi Phạm Bình Minh ba jơlan hlâo grŭp khua pơ ala kơ Việt Nam nao pơhmư̆ mông jơnum anai. Bruă jơnum tal anai hmâo năn ñu “Pơsit bruă mă mơng kual ASIA amăng rŏng lŏn tơnah kah pha”. Hrom hăng hơdôm tơlơi pơhiăp pơdah tui tlôn mơng ƀing khua mua, lu mông bơkơtuai amăng 2 hrơi hăng anăn ñu: Pơplih rŏng lŏn tơnah mơng kual ASIA – pơgi kơdih anai dưi pơjing hơdôm djuai anom bơwih ƀong; Tơlơi rung răng Mi hăng Khač hăng bơbeč truh tơlơi hơđong, rơnuk rơnua, bơwih ƀong mơng kual ASIA; Pơđĭ kyar anom bơwih ƀong kual ASIA hluai tui bruă bơkơtuai nao rai bôh thâo... amra dưi pơphun. Mơng anun, hơdôm bôh dêh čar kual ASIA amra gum hrom kơjăp hloh dong amăng bruă bŏng glăi hăng hơdôm tơlơi lông phrâo amăng kual hăng đơ đam rŏng lŏn tơnah, pơdŏng sa kual pơđĭ kyar djru kơ tơlơi rơnuk rơnua hăng hơđong amăng kual./.

Siu H’ Prăk: Pơblang