VOV4.Jarai - Mơguah anai (23/5), ƀơi Sang mă bruă Khua pơ ala mơnuih ƀôn sang, plơi prong jưh jom Hà Nội amra pok phun tal jơnum lok 3, Khua pơ ala mơnuih ƀôn sang dêh čar ta tal 15. Tui tơlơi pơkă lăng hlâo jơlan hơdră, tal jơnum pơphun amăng 19 hrơi, (pơkă lăng hlâo pơđut amăng lơ 16/6/2022). Anai lĕ tal jơnum hơbit tal blung a tơdơi kơ 2 thun bơbeč mơng klin Covid-19. Tal jơnum lok 3, Khua pơ ala mơnuih ƀôn sang dêh čar ta tal 15 pơphun amăng hơdôm hrơi đơ đam dêh čar ta glăk pok pơhai ngă tui khop, dơlăm, ba glăi bôh tơhnal Jơlan hơdră abih bang pơgang, pơgăn Covid-19 hăng Jơlan hơdră hơkrŭ glăi hăng pơđĭ kyar bơwih ƀong – mơnuih mơnam; biă ñu, Jơnum tal 5 Grŭp mă bruă Ping gah tal 13 phrâo pơđut klă hiam, ba glăi hơdôm pran pơtrut ngă tui truh kih Tơlơi pơtrun pơsit Jơnum prong 13 mơng Ping gah amăng rơnuk phrâo. Amăng tal jơnum, Khua pơ ala mơnuih ƀôn sang pel ĕp, lăng glăi 5 rơwang bruă tơlơi phiăn, 3 hră čih tơlơi pơtrun pơsit hăng gum pơhiăp hăng 6 rơwang bruă tơlơi phiăn pơkon. Khua pơ ala mơnuih ƀôn sang ăt pioh mơn lu mông pioh pel ĕp hơdôm tơlơi bơwih ƀong – mơnuih mơnam, ngăn drăp kơnuk kơna hăng tơlơi pơsit lu tơlơi yôm phăn pơkon mơng lŏn ia./.

Siu H’ Prăk: Pơblang