Anai jing jơlan hơdră hơmâo pơmut hrŏm mơ̆ng 4 Jơlan hơdră dêh čar pơtrun kiăng ngă hlâo adih jing sa khul bruă dưm kơnar, hơmâo: Akŏ pơjing plơi pla phrâo, hrŏ trun sang anŏ rin hơđong kjăp, đĭ kyar bơwih ƀong huă - mơnuih mơna kual mơnuih ƀôn sang djuai ƀiă hăng čư̆ siăng; Đĭ kyar gru grua; Pơplih phrâo, pơđĭ tui anŏ klă bruă pơtô hăng pơjuăt; Lăng ba tơlơi suaih pral, mrô ană mơnuih hăng đĭ kyar. Prăk pioh ngă bruă amăng rơwang thun 2026-2030 giăm 880.000 klai (amăng anun prăk mơ̆ng Gơnong dlông brơi lĕ 345.000 klai prăk); kiăng brơi hlâo kơ hơdôm kual tơnap tap.

Prăk kăk mơ̆ng jơlan hơdră anai pơƀut djơ̆ anŏ kiăng, tuh pơ alin kơ mơnuih ƀôn sang tŭ mă anŏ klă, khut ƀu mă yua či apah prăk blan ƀudah brơi či ngă bruă re se mơng gong gai ôh. Gơnong dlông jao kơ să wai lăng hơdôm kơčăo bruă anet, boh thâo amuñ  ƀiă. Hơdôm kơčăo bruă yŭ kơ 500 klăk prăk dưi jao hlao kơ kual plơi pla ngă. Ƀơi mông jơnum, Khua dêh čar ơi Lê Minh Hưng kiăng pơtum djŏp jơlan hơdră dêh čar pơtrun khŏm pơplih sit nik amăng bruă wai lăng, huăi hơmâo lu đơi anom bruă gơgrong, hră pơ-ar hai aset mơn, laih anun anăm ngă bruă pơpha hyu raih daih, bơrơkua nao rai ôh; pơđĭ tui anŏ klă mă yua prăk kăk; pơƀut mă yua prăk mơ̆ng kơnuk kơna kiăng djơ̆ akŏ, djơ̆ bruă či kiăng. Khua dêh čar jao kơ Khua Jơnum min mơnuih ƀôn sang hơdôm boh tơring čar, ƀôn prong ngă Khua khul git gai bruă gưl tơring čar, laih anun prăp rơmet hơmâo djŏp mơnuih mă bruă amăng gong gai hlâo kơ kơnôl 25/10. Hơdôm boh tơring khŏm pơƀut brơi nao abih hlao năng ai 12.000 klai prăk aka ƀu mă yua mơ̆ng rơwang thun 2021-2025 pioh truh pơ thun anai./.