VOV4.Jarai-Tlam lơ 9/8, ƀơi sang Jơnum khua pơ ala mơnuih ƀôn sang dêh čar, Pok pơhai jơnum lok 14 mơ̆ng Jơnum min Phun pơ ala mơnuih ƀôn sang dêh čar. Ƀơi mông jơnum anai, Jơnum min Phun pơ ala mơnuih ƀôn sang dêh čar pơgôp hiăp kơ akŏ bruă tuh pơ alin bruă čar ƀiă thun mă yua prăk gơnong dlông mơ̆ng thun 2021-2025 kơ hơdôm anăn kơčăo bruă hơmâo ngă giong hră pơar tuh pơ alin pơhrua nao dơ̆ng, čih pơkra pơkă glăi boh tơhnal mă yua prăk gơnong dlông mơ̆ng thun 2021-2025 mơ̆ng djop ding jum, anom bruă gơnong dlông hăng djop tơring čar tal 3. Pơgôp hiăp kơ bruă ngă yak blung a hơdôm boh tơhnal sem lăng Bruă ngă tui jơlan hơdră, tơlơi phiăn kơnuk kơna kơ bruă pơkrem, pơgăn phăk phai mơ̆ng thun 2016-2021 hăng hơdôm boh yôm phun pơkŏn.

Tơlơi lăp đing nao lĕ, jơnum anai, Jơnum min Phun pơ ala mơnuih ƀôn sang dêh čar amra pơphun glăi bruă mă tơña hăng glăi glăi. Khul bruă mơta sa Jơnum min Phun pơ ala mơnuih ƀôn sang dêh čar či tơña amăng bruă mă mơ̆ng Ding jum kông an. Tơlơi glăm ba lăi glăi mơ̆ng Khua ding jum kông an ơi Tô Lâm. Khul bruă dua dơ̆ng lĕ gah gru grua boh thâo pơrơguăt drơi jăn hăng tuai čuă ngui. Tơlơi gơgrong phun mơ̆ng Khua ding jum ơi Nguyễn Văn Hùng. Ƀơi mông tơña hăng lăi glăi, hơdôm kơ-iăng khua dêh čar laih anun Khua ding jum amra gum hrom lăi glăi tơlơi tơña, pơblang rơđah hơdôm tơlơi pơdjơ̆ nao 2 mơta bruă hơmâo lăi anun.

Nay Jek: Pơblang