VOV4.Jarai - Mơguah lơ 29/8, ƀơi plơi prong Đồng Hới, tơring čar Quảng Bình, Grŭp pơtô bruă Ping gah dêh čar ta pok pơhai Jơnum pơplông nai pơblang bruă kơđi čar rơgơi kual II (kual Tŏng Krah hăng kual Dăp Kơdư) thun 2022. Pơphun mơng lơ 29 truh lơ 31/8, Jơnum pơplông nai pơblang bruă kơđi čar rơgơi kual II (kual Tŏng Krah hăng kual Dăp Kơdư) thun 2022 ngă pơhư̆č tơlơi gum hrom mơng 35 čô mơnuih pơplông rai mơng 18 bôh tơring čar, ƀôn prong amăng kual.

Ƀơk khăn gru hơdor glăi kơ hơdôm grŭp hmâo mơnuih gum hrom pơplông

Amăng mông jơnum thun anai, ƀing nai ruah mă tơlơi pơblang amăng hơdôm jơlan hơdră pơtô pơhrăm, pơhrăm brơi dong pơblang bruă kơđi čar hăng jơlan hơdră pơhrăm brơi dong akô̆ bruă kơ Anom bruă pơtô bruă kơđi čar gưl tơring glông yua kơ Grŭp pơtô bruă Ping gah dêh čar ta mă yua. Ƀing pơplông găn rơgao 3 črăn pơplông, anun lĕ: Dăp hơdră bruă pơblang, pơblang brơi mơnuih hrăm, lăi glăi tơlơi tơña. Ƀing nao pơplông amra hmâo tơhnal pơdah bôh thâo mơng pô, ăt kah hăng bơkơtuai, hrăm tui hăng ƀing gŏp amăng bruă pơtô pơhrăm pơblang bruă kơđi čar hăng hơdôm bruă mơnuih mơnam pơkon./.

Siu H’ Prăk: Pơblang