VOV4.Jarai - Čơtlăm lơ 30/5, Grŭp hyu mă bruă mrô 8 mơng Grŭp Črâo ba pơgang, pơgăn hưp ƀong kông ngăn, tơlơi ƀu klă dêh čar ta (Grŭp črâo ba) yua kơ ơi Lê Minh Trí, Ding kơna Ping gah dêh čar Khua Anom pel ĕp kơđi tơlơi dêh čar ta, Ding kơna Grŭp črâo ba ngă Khua Grŭp hmâo laih mông mă bruă hăng Ping gah Kông ang dêh čar kiăng pok pơhai Kơčăo bruă mrô 18 mơng Grŭp Črâo ba.

Pơhiăp amăng mông klah čun mă bruă, ơi Lê Minh Trí brơi thâo, bôh than mơng bruă pel ĕp tal anai lĕ kiăng pơsit tơlơi klă, bôh tơhnal dưi ngă, samơ̆ ăt dô̆ mơn tơlơi akă dưi ngă, bôh than ba truh amăng git gai, črâo ba hăng pơphun ngă tui. Mơng anun, thâo, rơkâo pơsir hơdôm kơđi tơlơi hmâo gru nam ngă soh gah hưp ƀong kông ngăn, bơwih ƀong, tơlơi ƀu klă mơ̆ ƀu dưi pơsir ƀudah pơsir tui tơlơi pơkă mơng Ping gah hăng tơlơi phiăn mơng Kơnuk kơna; pơsir ƀudah rơkâo pơsir tơpă hơdôm tơlơi ƀu klă, tơlơi ngă soh phiăn, bĕ, hơngah hơdôm tơlơi klah čun lăng glăi, pơsit mơ̆ ƀu hmâo phun akha; ba tơbiă hơdôm bruă mă, jơlan pơsir, bruă pơsir kiăng pơđĭ tui bôh than hăng bruă thâo, pơtô glăi, tŭ mă, pơsir tơlơi pơhing kơ tơlơi ngă soh hăng bruă lăng glăi, pơsit./.

Siu H’ Prăk: Pơblang