VOV4.Jarai - Pơhiăp amăng mông jơnum tal sa Grŭp črâo bruă pơplih pơkra hră pơ-ar mơng Kơnuk kơna pơphun amăng mơguah lơ 9/3, Khua dêh čar ta ơi Phạm Minh Chính Khua Grŭp črâo ba lăi rơđah, khom pơjing yak pơplih phrâo kơ tơlơi pơplih hră pơ-ar, biă ñu bruă ngă hră pơ-ar pioh kơ mơnuih ƀôn sang, anom bơwih ƀong, kiăng rŭ tơgŭ hăng iâu pơhrui djop ngăn rơnoh kiăng pơđĭ kyar lŏn ia. Khom pel ĕp dong bruă gơgrong, bruă mă, tơlơi dưi bĕ bơrơkua bruă mă hăng hrŏ trun bruă găn rơgao pô tŏng krah. Khua dêh čar ta ơi Phạm Minh Chính lăi rơđah, mông jơnum anai hmâo bôh yôm phăn biă kiăng pơsit bruă pơplih pơkra hră pơ-ar thun 2021, pơsit bruă mă thun 2022; bơkơtuai sa dua tơlơi pơkă, bruă mă. Bruă pơplih pơkra hră pơ-ar khom dưi pơtrut kiăng djru pơgăn tơlơi ƀu klă, ngă prung, biă ñu hưp ƀong mă ƀiă. Gah bruă mă rơđah rơđông, Khua dêh čar ta rơkâo, kơtưn bruă mă mơng khua mua; pok pơhai khop, ba glăi bôh tơhnal Jơlan hơdră abih bang pơplih pơkra hră pơ-ar kơnuk kơna rơwang mơng thun 2021-2030./.

Siu H’ Prăk: Pơblang